Министерот за финансии Фатмир Бесими одржа повеќе состаноци со претседателите на стопанските комори на коишто се дискутираше за даночната реформа и за акцискиот план за годинава во однос на Стратегијата за реформа на даночниот систем за периодот 2021-2025 година.
На состаноците, министерот Бесими ја истакнал важноста од партнерството на Владата со приватниот сектор и порачал дека покрај преземените мерки, важна е конзистентноста и инклузивниот процес со засегнатите страни при носењето на одлуките.
На состанокот се разговарало и за приоритетите на Стратегијата за реформа на даночниот систем кои се во насока на поголема праведност во одданочувањето, поголема ефикасност и ефективност на даночниот систем за подобра наплата на приходите, намалување на неформалната економија, поголема даночна транспарентност, подобар квалитет на услугите и воведување еколошко (зелено) оданочување.
На средбите присуствувале претседателите на Стопанската комора на Македонија, Бранко Азески и на Комората на Северозападна Македонија, Неби Хоџа, потоа на Советот на странски инвеститори Штефан Петер, на Асоцијацијата на компании со технолошко напредно производство, Виктор Мизо, на МАТТО, Ајдован Адемоски, на Делегацијата на германското стопанство, Патрик Мартенс, на МАСИТ Анета Антова Пешева – на МАСИТ, на Асоцијацијата за е-трговија Нина Ангеловска – на Асоцијацијата за е-трговија и потпретседателот на Сојузот на стопански комори Драган Митковски.
