Од Македонија во Германија во мај биле извезени стоки вредни 244 милиони евра што е за околу 100 милиони евра помалку од мај минатата година или пад од високи 29,3%. Количински, извозот во Германија бил помал дури 41,7% во мај во споредба со истиот период лани.
Вкупниот извоз од земјава во Германија за периодот од јануари заклучно со мај изнесувал 1,37 милијарди евра и е за околу 250 милиони евра помал во споредба со истиот период минатата година, што е годишен пад од 15,3%.
Речиси две третини или 58% во првите пет месеци годинава отпаѓаат на извоз на хемиски производи, односно извоз на катализатори и уреди за прочистување наменети за автомо билската индустрија во Германија кои ги произведува Џонсон Мети во зоната Бунарџик.
Втора најголема ставка во овој период е извозот на машини и транспортни уреди во вредност од 396 милиони евра.
Намалувањето на извозот во Германија главно се должи на намалените нарачки како последица на забавувањето на германската економија, но и намалените цени на одредени извозни производи.
Македонските компании во мај годинава извезле стоки во вредност од 603 милиони евра, што е пад за 21,6% или за 166 милиони евра помалку во споредба со мај минатата година, покажуваат последните податоци од Државниот завод за статистика.
Обемот на извезени производи во мај е помал за 4,6%, што упатува на тоа дека падот на извозот во поголем дел е заради намалените извозни цени.
На германскиот пазар во првите пет месеци годинава македонските компании извезле и храна во вредност од 8,7 милиони евра, како и пијалоци и тутун во вредност од 5,9 милиони евра.
