Европската унија годинава ќе забележи економски пад од 7,4% во 2020 година и ќе и бидат потребни две години да се врати на нивото пред пандемијата, објави денеска Европската комисија.
Економијата на ЕУ ќе порасне за 4,1% следната 2021 година, а 3% во 2022 година, според есенската економска прогноза на Европската комисија.
Во еврозоната, економскиот пад ќе биде 7,8% во 2020 година, а потоа ќе забележи раст од 4,2 % во 2021 година и 3% во 2022 година.
Најновите проекции за раст и за ЕУ и за еврозоната се малку повисоки за 2020 година и пониски за 2021 година во споредба со пролетната економска прогноза на Европската комисија.
ЕК соопшти дека економската активност во Европа претрпела голем шок во првата половина на оваа година поради пандемијата на коронавирусите и се опоравила во третиот квартал кога постепено беа укинати мерките за спречување на ширењето на вирусот.
„Сепак, повторното оживување на пандемијата во последните неколку недели предизвика нарушување бидејќи националните влади воведоа нови мерки во јавниот здравствен сектор за да се запре ширењето на вирусот“, се вели во соопштението од ЕК, додавајќи дека предвидувањата за раст се многу несигурни.
Економските последици од пандемијата, како и очекуваното закрепнување, варираат во земјите на ЕУ, во зависност од ширењето на вирусот, спроведените мерки, секторскиот состав на националните економии и силата на националниот одговор на пандемијата.
Мерките преземени од земјите-членки, како и иницијативите на ниво на ЕУ, помогнаа во ублажување на влијанието на пандемијата врз пазарот на трудот, така што растот на невработеноста остана ограничен во споредба со падот на економската активност.
Невработеноста се очекува да се зголеми уште следната година, но ситуацијата треба да се подобри во 2022 година со закрепнување на економијата.
Според прогнозата на ЕК, стапката на невработеност во ЕУ ќе се зголеми од 6,7% во 2019 година на 7,7% во 2020 година и 8,6% во 2021 година, а потоа ќе се намали на 8% во 2022 година.
ЕК предвидува и големо зголемување на државниот дефицит како резултат на зголемените социјални трошоци и пониските даночни приходи, што се последици од мерките преземени од владите за поддршка на економијата.
Вкупниот дефицит во еврозоната ќе се зголеми од 0,6% од БДП во 2019 година на околу 8,8% во 2020 година, а потоа ќе се намали на 6,4 % во 2021 година или на 4,7% во 2022 година.
Вкупниот јавен долг во еврозоната ќе се зголеми од 85,9 % од БДП во 2019 година на 101,7% оваа година, 102,3 % следната година и 102,6 % во 2022 година.
Потпретседателот на Европската комисија Валдис Домбровскис рече дека новиот бран на пандемија создава уште поголема несигурност и ги намалува надежите за брзо закрепнување, соопшти ЕК.
„Економското производство на ЕУ нема да се врати на нивото на пред-пандемијата до 2022 година“, рече Домбровскис, повикувајќи го Европскиот парламент и Советот на ЕУ да ги завршат преговорите за следниот пакет за економско опоравување што е можно поскоро, така што парите ќе бидат достапни за инвестиции, реформи и обнова.
Европскиот комесар за економија Паоло Џентилони изјави дека во услови на голема неизвесност, националните економски и фискални политики мора да дадат поддршка.
„После најдлабоката рецесија во историјата на ЕУ во првата половина на оваа година и многу силниот залет во текот на летото, закрепнувањето на Европа е прекинато поради обновениот пораст на бројот на случаи со КОВИД-19“, рече Џентилони .
Есенската прогноза на ЕК наведува две можни сценарија за понатамошен развој.
Доколку се влоши пандемијата, ќе бидат потребни построги здравствени мерки, кои ќе остават поголеми и подолготрајни последици во економијата. Исто така е можно последиците од пандемијата, како што се стечаите, долгорочната невработеност или нарушувањата во снабдувањето, да бидат подлабоки и далекусежни.
Исто така, постои опасност за европската економија доколку глобалната економија и светската трговија не закрепнат како што е предвидено или ако се зголемат тензиите во трговските односи.
