Целосното запирање на рускиот извоз на природен гас ќе ја чини Германија 12,7 % од економските перформанси во втората половина на 2022 година, покажуваат податоците презентирани од Асоцијацијата на индустријата vbw на покраината Баварија.
Руски Гаспром ја намали испораката на гас за Германија преку гасоводот Северен тек 1 за 60% поради, како што тврдат, доцнењето на опремата што ја испратија до Сименс на ремонт.
Поради загриженоста за натамошните намалувања на руските испораки на гас во Европа, германската влада минатата недела ја започна втората од вкупно трите фази на ескалација на нејзиниот безбедносен план за гас.
Во случај снабдувањето целосно да се запре, податоците анализирани од истражувачите Prognos, нарачани од vbw, покажаа дека индустријата за стакло, челик, хемикалии, керамика, прехранбена и текстилна индустрија ќе бидат првите и најтешко погодените сектори во земјата која потроши 1.003 терават часови ( TWh) гас во 2021 година, од кои индустријата 36%.
Вклучувајќи ги и негативните ефекти, како што е влијанието врз синџирите за испорака, проценетата загуба во создавањето вредност може да изнесува 193 милијарди евра (204,33 милијарди долари) во периодот од шест месеци, се вели во студијата.
„Ненадејниот прекин на увозот на руски гас, исто така, би имал значително влијание врз работната сила во Германија. Околу 5,6 милиони работни места ќе бидат засегнати од последиците“, изјави извршниот директор на vwb, Бертрам Бросарт.
Сезоната за греење со гас за половина од 41 милион домаќинства во Германија кои се потпираат на гас започнува во октомври, до кога Министерството за економија сака подземните складишта – кои можат да чуваат доволно за два и пол месеци потрошувачка – да бидат полни 80% во споредба со 60,3% сега.
За да се решат можните недостатоци, владата, исто така, ги засили плановите за увоз на повеќе течен природен гас (LNG) за да се намали зависноста од гасот.
