Европската централна банка (ЕЦБ) по шести пат ги зголеми каматните стапки за 50 базични поени, или 0,5%, на 3,5%.
Сега каматните стапки на девизните средства ќе изнесуваат 3%, на операциите за главно рефинансирање 3,5 % и на маргиналните кредитни капацитети 3,75 %
Порастот на клучните каматни стапки на ЕЦБ се одразува и на трошоците за задолжување. Имено, поради оваа одлука ќе се зголемат стапките на Еурибор, што автоматски влијае на зголемувањето на ратите на кредитите во евра за кредитокорисниците и во Македонија, со оглед на тоа што каматната стапка на овие кредити е поврзана со движењето на оваа европска каматна стапка.
Со шестото по ред зголемување на каматните стапки, чуварите на валутата на еврото се обидуваат да ја намалат високата инфлација.Во февруари стапката на инфлација во зоната на заедничката валута беше 8,5 отсто, според проценката на европската статистичка агенција Еуростат, по 8,6 отсто во јануари. Високите цени на енергијата и храната ја поттикнуваат инфлацијата.
Многу економисти очекуваа дека ЕЦБ ќе се држи до предложеното храбро зголемување на каматните стапки, и покрај неизвесноста во банкарскиот сектор по колапсот на неколку помали американски банки и загриженоста за големата швајцарска банка Credit Suisse. ЕЦБ истакна: „Банкарскиот сектор во еврозоната е отпорен: позициите на капиталот и ликвидноста се здрави“.
Повисоките стапки на инфлација ја намалуваат куповната моќ на потрошувачите, тие можат да си дозволат помалку за едно евро. Зголемувањето на каматните стапки може да се спротивстави на високите стапки на инфлација бидејќи заемите стануваат поскапи и тоа ја забавува побарувачката. Сепак, нагло зголемувањето на каматните стапки може да ги стави банките под притисок, како што неодамна се покажа со колапсот на банката во Силиконската долина (SVB) во САД.
