Владата на Србија, односно Министерството за труд, вработување, ветерани и социјални работи, е во процес на склучување договор со Бангладеш, Виетнам и Гватемала, кој би го олеснил доаѓањето на работниците од овие земји во Србија, објавува српскиот весник Данас.
За ова наводно се разговарало на меѓуресорската средба минатата недела, кога меѓу другото, министерот за надворешни работи побарал од Министерството за труд список на области во кои Србија има потреба од работна сила. Бангладеш со повеќе од 160 милиони жители и Виетнам со речиси 100 милиони можат да бидат неисцрпен извор на работна сила за Србија, но прашање е под кои услови.
Она што е несомнено е дека ова е добра работа за работодавците. Како што објаснува Небојша Атанацковиќ од Сојузот на работодавачи на Србија, зголемувањето на понудата на пазарот на труд им одговара на работодавачите.
- Ако нема доволно луѓе кои би работеле, тоа му пречи на стопанството, но и ја зголемува цената на трудот. Нашата економија не може да плати колку што плаќаат во Западна Европа. Нашите компании не се на технолошко ниво за да можат да бидат продуктивни со скапа работна сила” – изјави Атанацковиќ.
Тој додаде дека кога луѓето од Србија одат во Западна Европа, тогаш некој треба да ги замени и на тој начин компаниите добиваат работници по подобра цена.
Работодавачите, како што рече, го поддржуваат увозот на работна сила, доколку нема домашна.
Недостиг од работници има во различни сектори, но недостигот и замената на странци е највидлив во градежништвото.
Минатата година Националната служба за вработување одобриla 23.662 работни дозволи за странци во Србија, речиси двојно повеќе од 2020 година. Но, тоа не е вистинската бројка на луѓе од странство кои работат во Србија.
Неофицијалните информации се дека на еден пријавен работник има три до пет непријавени работници.
Тој посочи дека недостигот од работна сила е критичен и затоа државата дозволува да се донесат работници кои ќе работат за 300 евра.
