Производството на патнички автомобили на германските производни линии бележи континуиран пораст во изминатите осум месеци, иако вкупните бројки остануваат долго зад оние постигнати пред Ковид-19.
Во цела 2022 година, производителите на автомобили испорачале 3,4 милиони единици, што е за 11% повеќе отколку во 2021 година, покажуваат податоците од федерацијата на автомобилската индустрија VDA.
Целокупниот пораст на годишно ниво е малку изненадувачки, со оглед на претходните прекини на производството предизвикани од недостигот на полупроводници, од кои производството на автомобили постепено закрепна минатата година.
Во декември е забележано производство од 253.700 единици, што е зголемување за 2% на годишно ниво, што го прави осми месец последователно во кој оваа бројка е повисока отколку во соодветниот месец од 2021 година. Но, во споредба со пред-пандемиската 2019 година производството е значително пониско за 26%, забележува VDA.
Бројките за извозот се слични, со зголемување од 10% до 2,6 милиони единици во текот на целата година. Споредено со 2019 година, извозот е понизок за 25%.
Бројките за Германија покажуваат поинаков тренд, односно зголемување на домашните регистрации за само 1% годишно до 2,7 милиони единици. Несигурноста околу поскапувањето на енергенсите и војната во Украина предизвикаа резервираност кај купувачите, особено во првата половина од 2022 година. Во подоцнежниот тек на годината, пазарот закрепна од почетниот шок, а продажбата значително се зголеми. Во декември се регистрирани продадени 314.400 автомобили, што претставува зголемување од 38% во однос на декември 2021 година.
Извор: Eurometal
