Индустриското производство во јули годинава во однос на на јули лани е намалено за 5%. Во периодот јануари – јули годинава споредено со истиот период лани бележи раст од 1,2%, објави Државниот завод за статистика.
Гледано по сектори, индустриското производство во јули годинава во однос на јули лани бележи опаѓање од 5,6% во Преработувачка индустрија, а од 12,2 % во Снабдување со електрична енергија, гас, пареа и климатизација опаѓање од 12,2%. Пораст од 7,3% има во секторот Рударство и вадење на камен.
Намалувањето во секторот Преработувачка индустрија, каде се создава околу 81% од вкупното индустриско производство на земјата, е резултат на намаленото производство во 13 од вупно 23 гранки. Најголемо намалување на производството во јули има во секторото производство на фабрикувани метални производи освен машини и опрема (-41,2%), производство на хемикалии и хемиски производи (-40,4%) и производство на метали (-40%), кои важат за енергетско интензивни сектори кои трошат големи количини на енергија, а истовремено се и најголеми извозни сектори.
Металопреработувачките компании како Еуроникел, Либерти, Макстил, Дојран Стил се најголемите потрошувачи на енергенси, кои се соочуваат со проблеми да го одржат производството заради преголемото покаќување на струјата и гасот.
Во групата на хемиски производи влегуваат и катализаторите и опремата за прочистување на издувни гасови кои најголемиот извозник во земјава Џонсон Мети ги произведува во зоната Бунарџик.
Пад на производството има и кај производство на моторни возила, приколки и полуприколки (-19,4%),производство на тутунски производи (-12,6%) и производство на прехранбени производи (-8,3%).
Производството е зголемено во десет индустриски гранки, меѓу кои најмногу во секторот производство на кожа и кожни производи (+48,1%), производство на машини и уреди (+31,4%), производство на лекови и фармацавтски производи (+25,1%), преработка на дрво (+21,4%), производство на компјутерски, електронски и оптички производи (+20,1%), производство на текстил (+13,1%) и производство на останата опрема за транспорт (+13,1%).
Според главните индустриски групи, производството во јули 2022 година, во однос на јули 2021 година, бележи опаѓање кај Енергија за 5,1 %, Интермедијарни производи, освен енергија за 12,8 проценти, Капитални производи за 1,9% и Нетрајни производи за широка потрошувачка за 1,5%.
