Најголемата македонска прехранбена компанија во својот бизнис план за оваа 2024 година очекува висок раст на приходите од продажба, како на домашниот пазар, така и на странските пазари.
Според објавениот финансиски и бизнис план за 2024 година усвоен од Одборот на директорри на крајот на минатата година се вели дека компанијата планира годинава да ја заврши со вкупни приходи од продажба од 80,18 милиони евра, што е големо зголемување од близу 46% во споредба со минатата 2023 година, која Витаминка ја заврши со приходи од продажба од 55 милиони евра.
Најголем дел или 62% од вкупните приходи од продажба Витаминка годинава планира да ги оствари на домашниот пазар. Компанијата планира годинава од продажба на производите на домашшниот пазар да оствари близу 50 милиони евра, што е за 46,6% повеќе во споредба со минатата година.
Од извоз на странски пазари Витаминка годинава планира да оствари приходи од 30,2 милиони евра, што е раст од 44,5% во спореедба со минатата година.
Компанијата Витаминка е најголема прехранбена компанија во Македонија и една од водечките во регионот, која во своето 65 годишно постоење успеа да создаде голем број брендови кои се препознатливи и се продаваат на домашниот пазар и на пазарите во регионот и светот.
Во најновата едиција ТОП 100 ИЗВОЗНИЦИ, Витаминка е рангирана како 45-ти најголем извозник од Македонија според остварениот извоз од 20,3 милиони евра во 2022 година.
