Германската деловна доверба се влоши на најлошото ниво од раните месеци на пандемијата поради зголемената загриженост дека рекордната инфлација и ограничените резерви на енергија од Русија ќе ја доведат најголемата европска економија во пад.
Индексот на доверба објавен денеска од страна на Институтот Ifo со седиште во Минхен падна на 80,3 во јули од 85,8 во јуни.
„Германија е на работ на рецесија“, рече претседателот на Ifo, Клеменс Фуест. „Високите цени на енергијата и заканата од недостиг на гас тежат врз економијата. Компаниите очекуваат значително полоша деловна активност во наредните месеци“.
Закрепнувањето од пандемијата веќе беше пригушено поради неконтролираната инфлација и недостигот на компоненти влошени со војната во Украина.
Стравувањата за испораките на руски гас исто така „тежат врз изгледите“ за германскиот раст, се вели во месечниот извештај на Ifo.
Клучен ризик за Германија, која увезува голем дел од својот природен гас од Русија, е дека понатамошното забавување или застој во снабдувањето со енергија може да ја зголеми инфлацијата.
Веќе притиснати од растот на цените, потрошувачите и компаниите сега мора да се борат со повисоки каматни стапки откако Европската централна банка ги зголеми каматните стапки за прв пат по повеќе од една деценија минатата недела.
