Двете водечки хрватски производствени компании од прехранбената индустрија, Атлантик Група и Подравка, се договорија да соработуваат за поуспешен настап на странските пазари, поточно во САД и Австрија.
Двете компании воведоа единствена практика на меѓусебна извозна поддршка, која подразбира дистрибутивната компанија на Атлантик во Австрија да обезбеди поддршка за пласман на производите на Подравка на австрискиот пазар, а во исто време Подравка, преку својата компанија во САД, ќе ги пласира производите на Атлантик на американскиот пазар, соопштено е од групацијата Атлантик.
Целта на оваа соработка е да се максимизираат меѓусебните синергии преку зајакнување на пласманот на производите на двете компании и подигање на препознатливоста на нивните брендови, користејќи ја развиената деловна мрежа и пазарните позиции кои Атлантик и Подравка ги наследуваат на овие пазари.
„Постигнувањето синергија меѓу Подравка и Атлантик на пазарите во Австрија и САД е важен чекор напред во деловните практики на хрватските компании во странство. Исклучително сум задоволна од овој чекор, бидејќи на овој начин две силни хрватски компании ги здружуваат силите за уште повеќе да извезуваат и да го зајакнат присуството на сопствените брендови и на европскиот и на американскиот пазар“, изјави Мартина Далиќ, претседателка на Управниот одбор на Подравка.
„Вегета и Аргета, како наши најистакнати извозни брендови, заедно со остатокот од нашето портфолио, се природни сојузници на меѓународните пазари. Горди сме на овој договор кој има многу јасна логика на користење заедничките можности. Отвореноста, довербата и интересот за изнаоѓање синергии на патот кон создавање нова вредност се вистинскиот темел на односот помеѓу Подравка и Атлантик Група“, истакна Емил Тедески, претседател на Управниот одбор на Атлантик Група.
Извор: Tportal.hr
