Европската Унија денеска донесе одлука за прераспределување на квотите за увоз на челик во ЕУ кои досега беа наменети за Русија и Белорусија, со која се зголемени квотите за македонските извозници за извоз на одделни видови челик европскиот пазар, потврдуваат за ИзвозМК компании оваа индустрија.
Според одлуката на ЕУ, за С.Македонија има зголемување на квотите за извоз на цевки за гасоводи и челични профили. Целосната одлука на ЕУ е на следниот линк.
Македонската челична индустрија и повеќе големи извозници од оваа индустрија веќе неколку години се соочуваат со ограничување на извозот на одделни производи од челик во ЕУ заради квотите за увоз и покрај Спогодбата за стабилизација и асоцијација која предвидува слободна трговија.
Квотите за увоз на челик од трети земји ЕУ ги воведе во 2019 година со цел да се заштити европската челична индустрија по едностраното воведување на царини од страна на САД за увоз на челик и алуминиум.
Но, откако пред неколку дена Европската Унија воведе санкции за увозот на челик од Русија и Белорусија, квотите за количините на челични производи кои досега се увезуваа од овие две земји се прераспределуваат на другите земји извознички, меѓу кои и Македонија, според нивниот удел во увозот во 2021 година со цел да се избегне ризик од недостиг на овие производи на европскиот пазар.
Меѓу најпогодените македонски извозни компании од ограничувањето за увоз на челични производи во ЕУ беа ИГМ Трејд, ФЗЦ 11 Октомври, Металопромет, Макстил, и Либерти.
