Изминатата 2021 година била лоша за македонските извозници на овошје. Податоците од Државниот завод за статистика покажуваат дека во текот на изминатата 2021 година од Македонија било извезено овошје во вредност од 47,85 милиони евра, што е за 11 милиони евра помалку во споредба со претходната 2020 година. Тоа е годишен пад на вредноста на извозот на овошје од 18,7%, но кај клучните извозни производи како на пример, јаболката и праската, тој пад е многу поголем.
Ако се гледа количински, извозот на овошје остварен лани во износ од околу 140 илјади тони бележи пад од 8% во споредба со 2020 година.
Анализата на извозот по пазари покажува дека најголем дел од падот на извозот на овошје лани се должи на намалените продажби на рускиот пазар, кој е најголем извозен пазар за македонското овошје. Минатата година извозот на македонско овошје во Русија изнесувал 12,2 милиони евра, што е пад од близу 40% или за 8,7 милиони евра помалку во споредба со 2020 година.
Најизвезувано овошје од земјава и понатаму останува јаболката. Минатата 2021 година од земјава биле извезени јаболка во вредност од 18,2 милиони евра, што е пад од 29,4% во споредба со претходната 2020 година. Продажбата на јаболки во странство претставува речиси 40% од вкупниот извоз на овошје од земјава.
Свежото грозје е второ најизвезувано овошје, од чиј извоз лани е остварен приход од 11,7 милиони евра. Извозот на грозје лани бил помал за околу 4% во споредба со претходната 2020 година, односно за 6% помал од извозот на грозје во 2019 година.
Следи извозот на сливи од чиј извоз лани биле остварени приходи од 2,9 милиони евра, односно за 12% помалку во споредба со претходната 2020 година.Но, и покрај падот, извозот на сливи лани бил за 70% поголем во споредба со претпандемиската 2019 година.
Извозот на лубеници лани бил зголемен за 39% и изнесувал близу 2 милиони евра.
Минатата година биле извезени праски само за 887 илјади евра, што е пад од речиси 75% во споредба со 2020 година кога извозот на праски изнесувал 3,5 милиони евра, но и во споредба со 2019 година кога на странските пазари биле продадени праски во вредност од 5,7 милиони евра.
Пад од извозот од 43% има и извозот на цреши кој лани изнесувал 1,9 милиони евра. Извозот на кајсии лани е намален за 60% и изнесувал само 212 илјади евра, што е голем пад и во споредба со извозот остварен во 2019 година во вредност од 1 милион евра.
Минатата година од Македонија биле извезени јапонски јаболка, односно персимон, во вредност од околу 1 милион е вра, а врендоста на извозот лани бележи пад од 12%.
Од друга страна, извозот на преработки од овошје лани се зголемил за 30% и достигнал близу 6,8 милиони евра, каде најголемиот дел отпаѓа на компоти од малини, капини и други бобинки.
И покрај падот, Русија останува најголем извозен пазар за македонското овошје
И покрај намалувањето од 40%, Русија лани била најголем извозен пазар за македонското овошје со извоз од 12,2 милиони евра, што е 25,5% од целиот извоз од земјата во 2021 година. Од нив 8,6 милиони евра, што е пад од 42% во споредба со извозот на јаболка на рускиот пазар во 2020 година вреден 12,2 милиони евра.
Втор најголем пазар за македонсото овошје лани бил Србија со извоз вреден 9,7 милиони евра, што е мало намалување во споредба со извозот од 9,4 милиони евра во претходната 2020 година.
Трет извозен пазар за македонското овошје била Бугарија со извоз од 3,4 милиони евра, кој е помал за 18,7% во споредба со извозот од 2020 година.
Четврт пазар е Косово каде лани биле извезени овошја во вредност од 2,6 милиони евра, што е на речиси исто ниво како и во 2020 година.
Романија со извоз од 2 милиони евра бил петти по големина пазар, а извозотна романскиот пазар лани е намален за 50% во споредба со извозот во 2020 година.
Извоз на овошје од околу 2 милиони евра лани бил остварен и во Гермнија, кој бележи годишен пад од околу 15%.
Голем раст на извозот на овошје лани имало во Грција, која се најде меѓу 10-те најголеми извозни пазари, со вкупен извоз на овошје од 2 милиони евра, пред се заради извозот на свежи јаболки од 1,5 милион евра.
Раст на извозот на овошје лани имало и во Италија, која со извоз вреден 1,6 милиони евра се најде меѓу 10-те најголеми извозни пазари за македонското овошје за 2021 година.
Следуваат Босна и Херцеговина со извоз на овошје од 1,58 милиони евра, Црна Гора со извоз од 1,4 милиони евра, Австрија со извоз на овошје од 1,37 милиони евра, Белорусија и Полска каде лани биле продадени овошја во вредност од по 1 милиони евра.
