Со својот огромен потенцијал и растечка потрошувачка моќ, Кина се очекува да стане втор по големина пазар на вино во следните три години, веднаш после САД. Проценките се дека до 2022 година кинескиот пазар на вино ќе вреди 19,5 милијарди долари, а бројот на консументи на вино ќе изнесува 70 милиони. Најголем пазар на вино сега е САД со вредност од 38,4 милијарди долари, а втора е Франција чиј пазар на вино се проценува на 16,5 милијарди долари.
Брзиот раст на кинескиот пазар ги привлекува извозниците на вино од целиот свет, а Европската унија е најконкурентен играч заради својата водечка позиција во производството на вино.
Извозот на македонски вина во Кина почнува полека да се зголемува во изминативе неколку години, но се уште е на многу ниско ниво. Во 2018 година во Кина се продадени македонски вина во вредност од 1,8 милиони евра, а во првите 11 месеци од 2019 година во Кина се извезени македонски вина во вредност од 1,3 милиони евра. Според податоците од Државниот завод за статистика Кина е шести по голема пазар за извоз на македонските вина.
Она што треба да се знае е дека Кина во моментов е четврти најголем увозник на вино во светот, а вредноста на кинескиот увоз на вино се очекува да скокне за најмалку 8% во текот на следната година.
Во моментов, Франција останува најголем извозник на вина Кина, но овој пејзаж брзо се менува бидејќи австралиските производители на вино брзо растат со оглед што од почетокот на 2019 година австралиските вина можат да се увезуваат во Кина без царина. Покрај Франција и Австралија, најголеми извозници на вино во Кина се Чиле, Шпанија,Италија, САД, Јужна Африка и Нов Зеланд
Исто така, на кинескиот пазар се почесто се продава вино од Источна Европа, од земји како што се Грузија, Молдавија и Украина, кои брзо ја зголемуваат продажбата.
Од земјите во рагионов најголем извозна вино има Бугарија од околу 5,5 милиони долари и Црна Гора со извоз од 2,2 милиони долари.
Бум на онлајн продажбата на вино
Една уникатна карактеристика на кинескиот пазар на вино е доминантната улога што ја игра е-трговијата во размери кој го нема било друг значаен пазар на вино во светот. Кинескиот онлајн пазар на алкохол во моментов вреди 6,1 милијарди долари и во моментов над 50% од кинеските потрошувачи купуваат онлајн еднаш месечно или почесто.
Виното сочинува 60-70% од продажбата на алкохол во електронската трговија, а онјалн продажбите се очекува да пораснат за 15% во текот на следната година, што претставува многу привлечен тренд за странските производители на вино.
Сепак, важно е да не се потцени перцепцијата на кинеските потрошувачи за виното и фокусираноста на цените. Иако виното станува сè попопуларно во Кина, просечните потрошувачи сè уште го преферираат пивото заради пониската цена и достапност. Всушност, кога станува збор за откривање на овој странски производ, вината со висок сооднос квалитет / цена имаат подобри можности да бидат забележани.
Пазарна сегментација: Наливни и флаширани вина
На кинескиот пазар за вино може да се забележат два главни сегменти: рефус или наливни вина и флаширани вина.
Со цена CIF (Cost, Insurance and Fright) од околу 0,6 евра за литар, наливното вино е најконкурентен под-сегмент на пазарот.
Во овој сегмент се лидери Чиле, Шпанија и Австралија. Трите земји заедно имаат пазарно учество од над 82% во наливните вина од увоз.
Два региони се главно заинтересирани за овие вина: винарии во областа Јантаи, провинција Шандонг и винарии од Шаченг, во провинцијата Хебеј.
Од друга страна, виното во шишиња, со просечна цена CIF од 2,6 евра е најпредизвикувачкиот под-сегмент заради разликите во цените. За повеќето кинески потрошувачи, таквата цена може да биде над она што го дозволува нивниот расположлив приход.
