Кинескиот извоз во мај забележа поголем пад од очекуваното, додека увозот го продолжи падот со побавно темпо како последица на намалената глобална побарувачка, особено од развиените пазари.
Кинеските испораки во странство во мај годинава паднаа за 7,5% во однос на мај минатата година на 284 милијарди долари, покажаа официјалните резултати. Тоа е многу поголем од очекуваниот пад на аналитичарите од 0,4%. Извозот во повеќето земји е намален, а двоцифрен процентуален пад на извозот е забележан за САД, Јапонија, Југоисточна Азија, Франција и Италија.
Во исто време, увозот во Кина се намали за 4,5%, на 218 милијарди долари, што е подобро од очекуваниот пад од 8%, оставајќи трговски суфицит од 66 милијарди долари.
Втората по големина економија во светот порасна побрзо од очекуваното во првиот квартал годинава благодарение на големата потрошувачка на услуги и заостанатите нарачки по годините на прекини заради Ковид 19, но производството на фабриките се забави бидејќи зголемените каматни стапки и инфлацијата ја притиснаа побарувачката во САД и Европа.
„Слабиот извоз потврдува дека Кина треба да се потпре на домашната побарувачка бидејќи глобалната економија забавува“, рече Живеи Жанг, главен економист во Pinpoint Asset Management.
„Постои поголем притисок за владата да ја поттикне домашната потрошувачка во остатокот од годината, бидејќи глобалната побарувачка најверојатно дополнително ќе ослабне во втората половина.
Истакнувајќи го степенот на слабост, податоците покажуваат дека трговијата била полоша дури и отколку кога пристаништето Шангај, најпрометното во Кина, беше затворено поради строгите ограничувања на Ковид 19 една година порано.
Бројките, исто така, се надополнуваат на растечката листа на показатели кои сугерираат дека кинеското економско закрепнување после Ковид 19 брзо ја губи силата.
