Производителот на топловалани лимови Макстил објави дека во првиот квартал годинава работел со приходи од продажба од 42 милиони евра, што е за дури 95% повеќе во споредба со приходите од продажба остварени во првиот квартал од 2021 година.
Неревидираните финансиските извештаи на компанијата објавени на Македонската берза покажуваат дека близу 92% од приходите од продажба се остварени од извоз, односно продажба на странски пазари, кои се поголеми за за 95% во споредба со истиот период од 2010 година, достигнувајќи 38,6 милиони евра.
Приходите од продажба на домашниот пазар, пак, изнесувале само 3,4 милиони евра и се поголеми за 86% во споредба со првите тримесеци од изминатата 2021 година.
Од извештаите може да се види дека оперативните расходи на Макстил во првите три месеци годинава бележат исто така голем раст од 66%, пред се заради големиот раст на трошоците за суровини и материјали, кои во првиот квартал годинава биле повисоки за дури 94% и достигнале 34,3 милиони евра.
Компанијата информира дека во периодот јануари-март годинава работела со оперативна добивка од околу 4,5 милиони евра, што е значително поголема од добивката од 1,6 милиони евра остварена во првото тримесечие од 2021 година.
Од Макстил велат дека започнатиот тренд на оправување на глобалната челична индустрија кој пона во текот на изминатата година полека почнува да паѓа во сенка на руско-украинската војна и пореметувањата на пазарот кои таа ги создава.
“Во наредниот период се очекува уште поголема рефлексија на воениот конфликт преку зголемување на цените на енергенсите и берзанските производи, особено на влезните суровини потребни за челичната индустрија, како и постојаните прекини во синџирот на снабдување, кои создаваа проблеми уште пред отпочнување на воениот конфликт”, велат од Макстил, потенцирајќи дека заради добрата организација на деловните процеси успеале навремено и успешно да одговорат на зголемената побарувачка за челични производи.
Зголемените приходи во работењето од компанијата ги објаснуваат со зголемениот обем на испорачани сопствени производи и зголемените цени на производите.
Но, повисоките цени на енергенсите и суровини, како и прекините во синџирите на снабдување ја принудиле компанијата да го намали производството годинава. Од Макстил информираат дека производството на челичен полуфабрикат во првите три месеци изнесувало 51.269 тона, што е намалување од 32,5% во однос на истиот период лани, односно намалување за 34,3% во однос на планираното производство за првиот квартал годинава.
Оствареното производство, пак, на дебели лимови во првите три месеци е зголемено за 16,2%, додека производството на топловалани лимови бележи зголемување од 14,6 % во однос на првиот квартал од 2021 година.
