Иницијативата „Отворен Балкан“ веќе дава резултати. Протокот на стоки добива на значење. На граничниот премин Табановце – Прешево камионите ги минуваат царинските и полициските контроли за помалку од четири минути, а целиот процес на проверки и пропуштање, заедно со ветеринарните и фитосанитарните инспекции, не трае повеќе од половина час, беше заклучено при заедничката посета на претставници на Коморите од Северна Македонија и Србија предводени од м-р Зоран Јовановски потпретседател од Стопанската комора на Северна Македонија и претседателот на српската Стопанска комора Марко Чадеж по работниот состанок на Табановце – Прешево со своите економски тимови.
Ваквите случувања се одличен показател за суштината на иницијативата „Отврен Балкан“.
“Во оваа прилика би сакал да истакнам неколку работи поврзани со тоа. Имено, во нашиот регион на Западен Балкан во минатото имаше разни иницијативи. Сите биле со најдобри желби и намери за напредок на регионот. Но, нивниот успех или неуспех најчесто се мерел преку воведувањето или преку невоведувањето одредена регулатива и сл.“, изјави потпретседателот на Стопанската комора Јовановски.
Може да се каже дека дури со т.н. „Берлински процес“, а во тие рамки и со „Отворениот Балкан“, е направено конкретно поместување, затоа што фокусот на „Отворениот Балкан“ е да се постигнат конкретни, видливи резултати.
За наши прилики вели Јовановски, изгледаше неверојатно кога во ноември минатата година во Ниш се одржа оперативен состанок на сите релевантни чинители од државниот сектор и од стопанските комори, за да се операционализираат заклучоците од Самитот во Белград, одржан само една недела претходно. Таа упорност и посветеност резултираше со потпишување важни меѓудржавни спогодби во Тирана веќе во декември минатата година.
Се разбира, работата не е завршена – таа само што започна. Како што поминува времето така ќе се проширува и портфолиото на области во кои ќе има заеднички активности. Во наредниот период се очекува земјите од „Отворен Балкан“ да обрнат поголемо внимание на соработката во образованието и во туризмот. Соработката меѓу трите земји од иницијативата „Отворен Балкан“ продолжува. Ќе ги отстрануваме сите пречки за поголема економска соработка во нашиот регион, со многу практични решенија посочи по работните средби потпретседателот на Стопанската комора на Северна Македонија.
Предноста на „Отворен Балкан“ не е само во тоа што камионите нема да чекаат долго или воопшто, туку соработката меѓу трите земји во однос на снабдувањето на храната и нејзината безбедност, снабдувањето со основни животни намирници. Тоа се големи работи – да не размислуваме дали имаме масло, брашно, шеќер или жито зашто секој од нас нешто има. Ако сме се согласиле дека ќе си помагаме, тоа и да го правиме. Во однос на храната која навистина е проблем и цената на пазарот кој остана без добар дел од количините кои доаѓаа од Русија, Украина, Белорусија, кога е во прашање „Отворен Балкан“ резултатите се гледаат – граѓаните на нашите земји не мора да размислуваат за работи за кои многу земји мора да размислуваат, нагласи Марко Чадеж, претседател на Стопанската комора на Србија.
Разговаравме како уште можеме да помогнеме – да донесеме контејнери кога е во прашање фитосанитарната и ветеринарната служба, да видиме како да го прошириме протокот, размената на информации зашто доаѓа до забавување на системот кога е голема фреквенцијата. Тоа е од интерес за двете земји зашто заштедува пари, информира Чадеж.
Економските тимови на српската и македонската стопанска комора, предводени од Чадеж и Јовановски, на работниот состанок разговараа како уште можат да помогнат за дополнително да го намалат и онака скратеното време на чекање на Табановце.
Во рамки на посетата на граничниот премин беше реализирана и средба на претставници на шпедиции кои финкционираат на двата премина, со претставниците од двете стопански комори.
