Пандемија на коронавирус може негативно да влијае на снабдувањето со храна во светот. Главната причина е недостаток на работна сила, како резултат на воведување на мерките за изолација и ограничувања на движењето, соопштуваат од Организацијата за храна и земјоделство на Обединетите нации (ФАО).
Во соопштението се вели дека досега немало нарушување на глобалното снабдување со храна, благодарение на претходните залихи. Сепак, според ФАО, проблеми може да се очекуваат во текот на април и мај.
Мерките за ограничување на движењата и социјално дистанцирање ќе го намалат земјоделското производство, проценува ФАО. Слична е ситуацијата во прехранбената индустрија.
Во соопштението се констатира дека веќе се присутни логистички проблеми и потешкотии производите да се транспортираат од местото каде се произведуваат до крајните потрошувачи.
Најпроблематични се месото и производите со краток рок на траење
Овие проблеми се особено видливи во производството на месо заради ограничениот пристап до добиточна храна и намалениот капацитет на кланиците. Истите проблеми беа присутни и во Кина во екот на епидемијата, потсетува ФАО.
Во вакви околности може да се очекува покачување на цената на месото и на производите со краток рок на траење, но тоа веројатно нема да биде случај кај главните прехранбени производи кои ги има доволно на залиха, предвидува ФАО
Слична проценка има и компанијата за истражување на пазарот Fitch Solutions.
„Производството на житарки во развиените земји, кое се одвива на големи имоти во помалку населени места, е помалку чувствително на мерките за изолација. Но, трудоинтензивните сектори како производството на овошје и зеленчук и производството и преработката на месо претрпуваат поголеми последици заради мерките за изолација “, се истакнува во анализата на Фич.
Ограничувањата на извозот може да го забрза зголемувањето на цените
Иако има доволно глвани прехранбени производи, ограничувањата на извозот што некои земји веќе започнаа да ги воведуваат, го зголемува ризикот од недостиг на прехранбени производи.
На пример, Виетнам значително го намали извозот на ориз за да создаде залихи од 270.000 тони за да го прехрани сопственото население.
Русија, пак, го забрани извозот на преработени житарки заради зголемената побарувачка од нејзините потрошувачи кои создаваа залихи. Извозот на пченица, по што Русија е светски лидер, засега не е ограничен.
Казахстан исто така забрани извоз на пченица, леќа, шеќер, сончогледово масло и некои зеленчуци.
Освен што можат значително да го поремтат глобалното снабдување со храна, ваквите потези од страбна на одделни држави можат да го забрзаат и растот на цените на храната во време кога потрошувачите загрижени заради мерките за изолација создаваат домашни залихи, оценува Фич.
Според аналитичарите на Фич, земји кои можат најмногу да бидат погодени од зголемувањето на цените на храната се оние кои зависат од увоз. Тоа пред се се земјите на Блискиот исток, Јапонија и Јужна Кореја. Заради пресметката во долари во меѓународната трговија со храна, на поголем ризик се озложени земјите со послаби валути, како Индија и Индонезија.
