“Покрај здравствените ризици, короната донесе и економски предизвици, затоа економскиот тим на Владата по темелните анализи дојде до прв сет на мерки преку кои земјата ќе се справува со економската криза на компаниите, изјави вицепремиерката за економски прашања Мила Царовска
Вицепремиерката Царовска денеска соопшти две мерки: едната за давање бескаматни кредити за микро, мали и среди претпријатија и другата за субвенционирање на придонесите за вработени од секторите што се погодени од вирусот.
„Првата мерка се однесува на директна финансиска поддршка за ликвидност на микро, мали и среди претпријатија. Обезбедени се вкупно 5,7 милиони евра со кои ќе се кредитираат директно компании погодени поради неликвидност, односно компании чија економска активност е погодена од коронавирус од страна на Развојната банка на Македонија. Кредитите се дизајнирани со големо внимание водејќи се од тоа да може да се одржат што поголем број на компании. Секоја компанија, во зависност од бројот на вработени, ќе може да добие од 3 до 30 илјади евра кредит“, изјави Царовска.
Висината на кредитите што ќе можат да се земат зависи од големината на компанијата. И тоа:
-Микро фирмите кои имаат до 10 вработени ќе можат да подигнат кредит од 3 до 5 илјади евра,
-Малите компании кои имаат од 10 до 50 вработени ќе можат да подигнат кредит од 10 до 15 илјади евра,
-Средните компании кои имаат од 50 до 250 вработени ќе можат да подигнат кредит од 15 до 30 илјади евра.
Царовска потенцира дека станува збор за бескаматни кредити кои омаат грејс-период од 6 месеци и период на отплата од две години, а администрирањето на кредитите ќе биде бесплатно.
Субвенции за придонесите
Втората мерка, посочи вицепремиерката, е за поддршка на компаниите во делот на исплата на плати и придонеси и таа се носи со цел да се задржат работните места.
„Затоа правиме напори да ја олесниме исплатата на плати во овој период на неизвесност и затоа обезбедуваме субвенционирање на придонесите за вработените во компаниите од секторите туризам, транспорт, угостителство и други погодени компании за април, мај и јуни 2020 со цел да субвенционираме придонеси по вработен во висина од 50% од придонесите за исплатена просечна плата во 2019“, изјави Царовска.
Прес за економските мерки на Владата на РСМ за справување со ситуацијата со коронавирусот
[?Во живо] Прес за економските мерки на Владата на РСМ за справување со ситуацијата со коронавирусот
Publiée par Влада на Република Северна Македонија sur Mercredi 18 mars 2020
За да можеат компаниите да ја користат оваа мерка компаниите треба да исполнуваат три услови:
-kомпанијата да не го намали бројот на вработени под бројот на вработени кој бил во февруари 2020 година;
-Компанијата да не исплатила дивиденда во 2020 година;
-Компанијата да нема исплатено награди и бонуси по влегување во сила на мерката.
„Мерката е директно насочена да им помогне на компаниите кои оствариле послаб финансиски резултат поради коронавирусот“, вели Царовска.
Да се работи и во четири смени
Вицепремиерката Царовска препорача во фабриките кои имаат поголем број на вработени, работодавците да го реорганизираат работењето во фабриките и погоните. Да се работи во смени, по потреба и во четири сменисо цел да има што е можно помал број вработени во ист момент во фабриките.
При промена на смени, порача Царовска, да се дезинфицираат фабриките.
Што се однесува до товарните возила што влегуваат во земјата, Царовска посочи дека дозвола за нив ќе издава Санитарниот инспекторат.
„Заради непречен влез и транзит на товарни возила, Санитарниот инспекторат преку ‘Макам транс’ ќе дава дозволи за влез со цел да не престане трговската размена со ниедна земја. Овие товарни возила ќе влезат во Република Северна Македонија со посебни услови на заштита и согласно протокол подготвен од Министерството за здравство“, рече Царовска.
Ќе биде исклучително важно, порача Царовска, ресурсите да ги насочуваме правилно кон компаниите кои се најпогодени од корона вирусот, а за таа цел продолжува и дијалогот со стопанските комори.
