Низ северна и западна Европа, производителите на зеленчук размислуваат да ги прекинат своите активности поради финансискиот удар од енергетската криза во Европа, пишува Ројтерс.
Зголемените цени на електричната енергија и бензинот ќе влијаат на културите што се одгледуваат во текот на зимата во загреани оранжерии како што се доматите, пиперките и краставиците и оние што треба да се стават во ладилници, како што се јаболката, кромидот …
Како последица на тоа, европските земјоделци предупредуваат на недостиг на многу зеленуци. Очекуваниот удар на производството и скокот на цените значи дека супермаркетите може да се префрлат на набавка на повеќе производи од потоплите земји како Мароко, Турција, Тунис и Египет.
Зголемените цени на гасот се најголемиот трошок со кој се соочуваат земјоделците кои одгледуваат зеленчук во оранжериите, велат земјоделците.
Ројтерс цитира француски земјоделци според кои, во обновените договори за електрична енергија за 2023 година, им биле побарани цени и повеќе од 10 пати поголеми од оние кои ги плаќале во 2021 година.
Ако остане вака, велат тие, нема смисла да се започне уште една година, бидејќи одгледувањето на зеленчук не е одржливо.
Шанса за југот
Земјоделците не се борат само со спиралните цени на енергијата. Трошоците за вештачко ѓубриво, пакување и транспорт се во пораст и ги загрозуваат маржите.
„Се соочуваме со севкупно зголемени трошоци за производство од околу 30%“, вели Јоханес Грос, заменик-менаџер за продажба во германската задруга Рајхенау-Гемузе, чии оранжерии покриваат околу 60 хектари.
Енергијата изнесува некаде помеѓу половина и две третини од овие дополнителни трошоци, рече тој.
„Некои колеги размислуваат да ги остават своите оранжерии празни за да ги одржат трошоците што е можно пониски. Никој не знае што ќе се случи следната година“, додаде тој.
Џек Вард, извршен директор на Британската асоцијација на одгледувачи, смета дека е неизбежно производството на овошје и зеленчук да се префрли на потоплите клими.
„Ќе го придвижиме производството понатаму и подалеку на југ, низ Шпанија и во Мароко и делови од Африка“, рече Вард.
