Во август годинава македонските компании реализирале извоз на производи вреден 555 милиони евра, што е за 11,8% помалку во однос на истиот месец лани, покажуваат најновите податоци од Државниот завод за статистика.
Ова е најголем пад на извозот од мај 2020 година, кога со стартот на пандемијата и затворањето на границите во февруари 2020 година извозот од земјата забележа големи стапки на пад во следните неколку месеци, односно во март (-26,8%), април (-60,3%) и мај (-39,2%).
Обемот на извезени стоки во август годинава бележи пад од 10%.
Статистиката покажува дека во август годинава имало и пад на увозот од 11,9%, при што биле увезени производи во вредност од 864 милиони евра, пад од 11,9% во споредба со истиот месец минатата година.
Дефицитот во трговската размена со странство во август годинава бил речиси 310 милиони евра, а покриеноста на увозот со извозот во август годинава бил само 64,2%.
Анализата на податоците покажува дека најголем пад на извозот во август годинава има Германија и Италија, два големи и многу важни извозни пазари за македонската економија.
Германија, која се соочува со рецесија и големи економски проблеми заради последиците од војната во Украина и енергетската криза е најголем извозен пазар за македонската економија, каде се пласира половина од вкупниот извоз од земјата. Во август годинава во Германија биле извезени стоки вредни 222 милиони евра, што е пад од 29, 1% во споредба со август минатата година. Обемот на извезените стоки во Германија во август бележи пад од 14,7%.
Ако се гледа, пак, вредноста на вкупниот извоз во Германија од јануари до август годинава, тој изнесувал 2,45 милијарди евра и бил поголем за 2,3%, но обемот, односно извезените количини на производи во најголемата европска економија е помал за 7% во споредба со истиот период лани.
Во Италија во првите осум месеци годинава биле извезени производи вредни 141 милион евра, што се за 32,5% помалку во споредба со истиот период лани. Само во август извозот во Италија бележи пад од 43% во споредба со август 2022 година.
Во август пад на извозот од 30% имало и во Бугарија, Полска (-17,2%), Србија (-7,8%), Грција (-4,5%).
Гледано по групи на производи, август имало голем пад на вредноста од дури 60% кај извозот на кожа и кожни производи, пад од 35% има и кај вредноста на извозот на хемиски производи, кај нафтените производи од 35%.
Раст на извозот во август имало кај вредноста на извезените жита и производи од жита од 32%, кај извозот на железо и челик од 24%, вредноста на извозот на автобуси за 15,4%, фармацевтски лекови од 12,5%, месо и преработки од месо за 20%.
Во првите осум месеци вкупниот извоз на производи од Македонија изнесувал 5,5 милијарди евра. Вредноста на извозот е поголема за 2% во споредба со истиот период лани. Увозот во првите осум месеци изнесувал 7,3 милијарди евра, пад од 7,6% во споредба со истиот период лани.
