Инфлацијата во еврозоната достигна рекордни 8,1% во мај поради зголемените трошоци за енергија и храна, делумно поттикнати од руската војна во Украина.
Годишната инфлација во 19-те земји кои користат евро валута се искачи над претходниот рекорд од 7,4% постигнат во март и април, покажуваат најновите бројки објавени во вторник од агенцијата за статистика на Европската унија, Евростат.
Инфлацијата во еврозоната сега е на највисоко ниво од почетокот на евиденцијата за еврото во 1997 година.
Цените на енергијата скокнаа за 39,2%.
„Енергетската инфлација веројатно ќе остане повисока подолго од претходно очекуваното“, откако Европската унија се согласи да воведе ембарго на најголемиот дел од увозот на руска нафта до крајот на годината, вели Ендрју Кенингам, главен европски економист во Capital Economics.
Суровата нафта од типот Брент, по договорот поскапе на 120 долари за барел.
Воведеното ембарго за увоз на нафта со цел да се казни Москва за нејзината војна со Украина е меч со две острици што исто така може да ја зголеми болката за луѓето и бизнисите кои веќе се борат да се справат со повисоките трошоци за енергија.
Цените на нафтата и природниот гас веќе се зголемија поради стравувањата дека војната ќе го прекине снабдувањето од Русија, најголемиот светски извозник на нафта. Силната глобална побарувачка по пандемијата „Ковид-19“ и внимателниот пристап кон зголемување на производството од нафтениот картел ОПЕК ги зголемија цените на енергијата.
Земјите соседи Русија кои се одвикнуваат од рускиот гас беа меѓу најтешко погодените. Стапката на инфлација во Естонија достигна 20 %, додека во Литванија беше 18,5%, а во Летонија на 16,4 %.
Цените на храната, алкохолот и тутунот се зголемени за 7,5% во мај, објави Евростат – уште еден знак за тоа како руската војна во Украина, главен глобален снабдувач на пченица и други земјоделски производи, ги зголемува цените ширум светот. Цените на стоките како облека, апарати, автомобили, компјутери и книги пораснаа за 4,2%. Цените на услугите се зголемени за 3,5%.
Инфлацијата е проблем и во другите напредни економии како Британија и САД, каде што е на највисоко ниво во последните четири децении.
Во Полска, која не го користи еврото, годишната инфлација во мај скокна на највисоко ниво во последните 24 години од 13,9%, објави во вторникот државниот завод за статистика.
Најновите бројки додаваат притисок врз претставниците на еврозоната да ги зголемат каматните стапки од ултра ниски нивоа за да го зауздаат растот на цените, иако тоа ризикува да го задуши економското закрепнување.
Европската унија претходно овој месец ја намали својата прогноза за економски раст за 27-члениот блок поради изгледите за долготрајна руско-украинска војна и продолжените прекини во снабдувањето со енергија.
Претседателката на Европската централна банка, Кристин Лагард, минатата недела даде најјасен знак досега дека стапките ќе почнат да растат наскоро, пишувајќи на блог дека очекува „да излезе од негативните каматни стапки до крајот на третиот квартал“.
