Државниот завод за статистика објави дека трошоците за живот или инфлацијата во јуни биле повисоки за 2,8% во споредба со претходниот месец мај. Во споредба пак со јуни минатата 2021 година инфлацијата е зголемена за 14,5%. Цените на мало во јуни, пак, биле за 13,7%
Најголемо зголемување на трошоците за живот има кај природниот гас и течните горива од 64, 6% во однос на јуни 2021 година. Следи маслото за јадење каде има зголемување од 51%, кај транспортот има зголемување од 31,4%, кај лебот од 31%, месото за 18,4%.
Пораст на трошоците на животот во споредба со претходниот месец, е забележан кај маслото и маснотиите за 10,4 %, лебот и житата за 7,8%, млекото за 6,7%, месото за 5,2%, свежото и разладеното овошје за 2,9%, шеќерот, џемот, медот, чоколадата и кондиторските производи за 2,7%, виното за 2,1%, минералната вода, газираните пијалаци, соковите од овошје и зеленчук за 1,0%.
Во мај годишната инфлација изнесуваше 11,9%, а месечната 2%. Во периодот 1997-2007 година просечната стапка на инфлација во земјава изнесувала 2%
Ако се анализираат историските статистички податоци, инфлацијата во земјава во јуни од 14,5% е на највисоко ниво во последните 25 години. Во периодот 1997-2007 година Македонија имаше релативно ниски стапки на инфлација со просечната стапка на инфлација изнесуваше 2%. Само во во 2008 година кога, како резултат на светската финансиска криза, просечната стапка на инфлација акцелерираше и достигна 8,3%. На крајот на 2009 година беше регистрирана дефлација од 0,8% како резултат на надолната корекција на цените на нафтата и прехранбените продукти. Во време на воената 2001 година годишната инфлација изнесувашеа 5,5%.
Во 1993 година и 1994 година, во периодот на ембаргото од страна на Грција инфлацијата изнесуваше 349%, односно 121,8%.
