Сепак, компаниите сè уште не ги одразиле целосно повисоките трошоци во крајните цени, па најверојатно тие ќе продолжат да растат
Германските производствени цени во октомври го забележаа својот прв месечен пад во последните две и пол години, поттикнувајќи ги очекувањата дека инфлацијата во најголемата европска економија можеби се приближува на својот врв.
Цените на производителите на индустриски производи паднаа за 4,2 отсто во однос на септември, главно поради падот на електричната енергија и природниот гас, покажаа податоците на Федералното биро за статистика. За споредба, аналитичарите очекуваа цените на производителите повторно да се зголемат за речиси 1 процент, според анкетата на Ројтерс.
Веста може да донесе одредена, ако и минимална, утеха на Европската централна банка (ЕЦБ), која агресивно ги зголемува каматните стапки за да ја скроти инфлацијата. Во текот на изминатата година, цените на производителите се зголемија побрзо од вообичаеното.
Сепак, падот доаѓа во време на нагло намалување на деловната активност во еврозоната во октомври, според индексот PMI.
Според Ралф Солвен од Комерцбанк, бројките „даваат причина за надеж дека стапката на инфлација на потрошувачките цени исто така наскоро ќе го достигне врвот. Сепак, тоа не значи дека проблемот со инфлацијата е завршен“.
Во однос на октомври минатата година, производителите на индустриски цени пораснаа за 34,5%, иако тоа претставува мало забавување во однос на август и септември.
Според истражувањето на економскиот институт Ifo, многу германски фирми сè уште не ги префрлиле своите повисоки трошоци на крајните цени, но планираат да го продолжат овој процес во наредните месеци.
Оптимизмот го заматуваат и податоците за базичната инфлација, која се чини дека не слабее, туку напротив – сигнализира поширока и посилна ценовна тензија. „Основните инфлациски притисоци не покажуваат знаци на стабилизирање, без разлика кој индикатор ќе го погледнете“, изјави за Ројтерс економистот на Danske Bank, Пиет Хајнс Кристијансен.
Како антиинфлациска мерка, германската влада планира да воведе „кочници“ на цените на гасот и струјата од почетокот на следната година, за што може да потроши и до 200 милијарди евра. Сепак, се очекува цените да продолжат да растат пребрзо во 2023 година – за околу 7%.
