Производителите на млеко во Србија предупредуваат дека заради тешката состојба во која се наоѓа овој сектор како последица на ниската откупна цена и поскапувањето на добиточната храна, производството драстично се намалува, и од септември е можен недостиг на млеко.
Како што пренесува српската агенција Бета, поради ова производителите на млеко трпат големи загуби и се одлучуваат да ги продадат кравите, поради што производството паѓа.
Недостигот на млеко во Србија сигурно би се одразил и врз производството и снабдувањето со млеко во Македонија, со оглед дека најголем дел од увозот на млеко е токму од соседна Србија. Според податоците од Државниот завод за статистика, Македонија увезла 26 милиони килограми млеко и млечни производ во вредност од 37 милиони евра. Најголема количина или 11,3 милиони килограми во вредност од 9,5 милиони евра биле увезени токму од Србија. Вредносно најголем увоз од 10,3 милиони евра е направен од Германија, но најголем дел е увоз на кашкавали и путери.
Српските земјоделците на ова предупредуваат уште од почетокот на пандемиската криза. Дополнителна причина за недостигот на млеко на пазарот е и фактот што производството на оваа храна паѓа и на светскиот пазар поради инфлацијата и цената на храната, па нема евтина суровина за увоз.
Дејан Трајковиќ, сопственик на фарма за крави во селото Скореновац во општина Ковин, за агенцијата Бета изјави дека резервоарите за млечни производи се празни и дека недостигот од млеко ќе се почувствува веќе во септември . “Нема млеко бидејќи помалите фарми се затворени, а останаа само средните и големите кои не можат лесно да се затворат поради огромните средства вложени во опремата“, вели Трајковиќ за Бета. Тој додава дека проблемот со ниската откупна цена трае веќе две-три години и дека во последните шест-седум години бројот на молзни крави паднал на 180.000 од некогашните 450.000 на 500.000.
Соговорникот на „Политика“ добро упатен во состојбата на пазарот вели дека недостигот на млеко веќе е видлив во продавниците каде понудата е многу помала од пред една година.
Дополнителен проблем годинава е и сушата, заради што многу фарми не успеале да произведат доволно сточна храна, а цените за увоз се многу високи, а и се потешко е да се обезбеди увоз, а зголемените цени за нафтените деривати и транспортот, го прави увозот уште поскап.
За производство на груба сточна храна годишно се потребни 267 литри дизел гориво, по крава, па јасно е колку се зголемени трошоците на сточарите, поради енергетската криза.
