Македонските компании во август годинава извезле стоки во вредност од 622 милиони евра, раст од 12,1% во споредба со истиот месец лани. Извезените количини на стоки, пак, бележат пад од 8,6% во споредба со минатата година, покажуваат последните податоци од Државниот завод за статистика.
Тоа упатува на заклучокот дека растот на вредноста на извозот се должи на повисоките продажни цени на странските пазари.
Увозот, пак, во август годинава изнесувал 850 милиони евра и е за 1,7% помал во споредба со истиот месец лани.
И покрај растот во август, вкупниот извоз во периодот од јануари до август бележи пад за 5,7%, и изнесувал 5,2 милијарди евра. Во периодот од јануари од август, односно за период од осум месеци, извозот во странство имаше пад дури шест месеци. Увозот во првите осум месеци бележи мал раст од 0,6%, достигнувајќи вредност од 7,3 милијарди евра. Трговскиот дефицит во првите осум месеци годинава достигна вредност од 2,1 милијарда евра, што е зголемување од 20% во споредба со истиот период лани, кога изнесувал 1,8 милијарди евра. Покриеноста на увозот со извоз, во периодот јануари – август годинава, изнесува 70.7 %.
Еден од поважните трендови во август во трговијата со светот, е што се опоравува извозот во Германија. Според податоците на Државниот завод за статистика, во август годинава во Германија биле извезени стоки во вредност од 271 милион евра, што е раст од 22,1% во споредба со истиот месец лани. Обемот на извезени стоки, пак, бележи раст од 24,1%. Сепак, заради падот на извозот во изминатите неколку месеци, вкупниот извоз во Германија за периодот јануари-август е понизок за 12,1% во споредба со истиот период лани и изнесувал 2,1 милијарда евра, што е близу 42% од вкупниот извоз на земјата во овој период.
Ако се анализираат 10-те најголеми извозни пазари за август, пад на извозот има единствено кај извозот во Косово и Унгарија. Во Косово во август биле извезени стоки вредни 30 милиони евра, за 22% помалку во споредба со август минатата година. Во Унгарија извозот бил помал за 9,9%.
Извозот во август бележи раст во Србија (25,8%), Бугарија (42,3%), Грција (22,8%), Чешка (57,4%), Словачка (17,6%), БиХ (21,8%) и Шпанија (19,4%)
Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и други катализатори на носачи.
Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и други моторни возила за превоз на лица.
