Глобалната побарувачка за нафта во првото тромесечие годинава ќе забележи прв квартален пад во последните 10 години заради тоа што коронавирусот предизвика застој на економската активност низ цела Кина, што се одрази врз побарувачката за нафта во кинеската економија, која е најголем светски потрошувач на нафта, соопшти Меѓународната агенција за енергетика (IEA).
Побарувачката во првото тромесечие во 2020 година ќе биде пониска за 435 илјади барели дневно во однос на истиот период пред една година, што ќе биде прв квартален пад во последното десетлетие.
Предвидениот пад на побарувачката ја натера Меѓународната агенција за енергетика да ја намали прогнозата за раст на побарувачката за нафта во 2020 година за 365.000 барели дневно, на 825.000барели дневно, што е најниско ниво од 2011 година.
Негативното влијание на епидемијата со коронавирус врз побарувачката на нафта ја намали и цената на “црното злато”. Така на пример, цената на северноамериканската брент нафта во јануари падна за речиси 10 долари, на помалку од 55 долари за барел.
Сепак, цената полека последнава недела почна да се опоравува во очекување дека главните членки од Организацијата на земји извознички на нафта (OPEK) и производителите надвор од нафтениот картел, со Русија на чело, би можеле дополнително да го намалат глобалното производство на нафта за да ги неутрализираат негативните последици на намалената побарувачка врз цената на нафтата.
