Продажбата на автомобили во Европската унија ќе порасне за 7,9% во 2022 година, но ќе остане далеку под нивото од 2019 година, покажуваат најновите проекции на Европската асоцијација на производители на автомобили (ACEA).
Од ACEA прогнозираат дека регистрациите на патнички автомобили во ЕУ ќе се вратат на раст оваа година, зголемувајќи се за 7,9% и ќе достигнат 10,5 милиони единици“. Тоа следи по 9,7 милиони продадени единици во 2021 година.
ACEA ја засноваше својата прогноза на очекувањата дека снабдувањето со полупроводнички чипови ќе се стабилизира оваа година, откако недостигот сериозно и наштети на индустријата минатата година.
Додека Европската унија во вторникот започна план за собирање десетици милијарди евра за зајакнување на производството на полупроводници во Европа, ACEA го повика блокот да ја намали зависноста од неевропски добавувачи за да избегне штета на индустријата во иднина.
По остриот пад на продажбата во 2020 година со пандемијата на коронавирус, автомобилските пазари во Соединетите Американски Држави и во ЕУ беа парализирани минатата година поради недостиг на полупроводници, особено на оние произведени во Азија.
Сепак, рече ACEA, уделот на хибридни и електрични возила продолжи да се зголемува: тие сега претставуваат еден од секои пет продадени автомобили во ЕУ.
„Сепак, не можеме да заборавиме дека ова е сè уште прилично кревок пазар“, според претседателот на ACEA и извршен директор на BMW Group, Оливер Зипс.
Тој додаде дека пазарот „многу се потпира на мерките за поддршка, како што се стимулации за купување и, пред сè, широката достапност на инфраструктура за полнење“.
Сепак, од ACEA потенцираат дека „темпото на ширење на инфраструктурата заостанува многу зад побарувачката на потрошувачите за автомобили на електрично полнење“.
ACEA ги повика парламентот и националните влади да го зајакнат предлогот на Европската комисија за да се обезбеди воспоставување соодветна мрежа за полнење.
