Извршниот директор на американската Финансиска корпорација за меѓународен развој (DFC), Адам Болер и директорот на Извозно-увозната EXIM банка на САД, Кимберли Рид, потпишаа писма на намери со Србија и Косово за финансирање на изградбата на „Автопатот на мирот“ помеѓу Ниш и Приштина.
Според соопштението од DFC, Болер и Рид ги потпишале писмата во вторникот, врз основа на „историскиот договор за економска нормализација што го потпишаа Србија и Косово“ на 4 септември во Вашингтон.
Наведено е дека писмата со намери не се обврзувачки и дека и двете агенции ќе извршат стандардни проверки пред официјално да се посветат на финансирање.
Проектот „Автопат на мирот“ веќе долго време е клучен дел од преговорите за нормализирање на односите меѓу Србија и Косово, според DFC.
Болер рече дека „Автопатот на мирот ќе го поттикне економскиот развој и регионална интеграција со поврзување на Ниш и Приштина“.
“Исто така, тоа ќе биде силен симбол на новиот, трансформативен однос на овие соседни земји. Во партнерство со EXIM банка, DFC е посветена на развој на овој мировен процес преку инвестирање во проекти кои создаваат работни места и им носат одржливи економски придобивки на двете земји”, рече Болер.
Значењето на автопатот е дека тој ќе поврзе околу половина милион граѓани кои живеат во областите Пирот, Нисава и Топлица, а ќе и овозможи на Србија пристап до албанското пристаниште Драч на Јадранското море.
DFC и EXIM , наводно, планираат да испратат делегации во Белград и Приштина овој месец, a DFC ќе ги постави темелите за отворање на својата прва канцеларија во регионот.
Српскиот претседател Александар Вучиќ и косовскиот премиер Авдулах Хоти ветија дека ќе ги нормализираат економските односи на 4 септември во Белата куќа. Во присуство на американскиот претседател Доналд Трамп, секој потпиша копија од документот во 16 точки наречен „Економска нормализација“. Во една од точките се наведува дека Косово и Србија ќе соработуваат со DFC и EXIM банката на САД за реализација на Автопатот на мирот, железничката врска меѓу Приштина и Мердаре, железничката врска меѓу Ниш и Приштина, обезбедување средства за финансирање заеми за мали и средни компании, дополнителни билатерални проекти и отварање на канцеларии на DFC во Белград.
Извор: Бета
