Денеска во ТИРЗ 1 беше промовирана новата фабрика YFA Automotiv, заедничка инвестиција на кинеската Јангфенг и американската АРЦ Аутомотив, во која ќе се произведуваат воздушни перничиња за автомобили.
Инвестицијата вредна 30 милиони евра ќе овозможи над 100 нови вработувања, а производите ќе се извезуваат на европскиот пазар.
„Денес не е лесно да се привлече инвестиција, особено после пандемијата со КОВИД-19 и посебно во време на војна која се води во Украина во отежнати економски услови, во нарушени синџири на снабдување, при високи стапки на инфлација. Но, токму нашиот пристап го потврди спротивното. Во текот на изминатиот период, денес но и во идниот месец гледаме отворање на нови производствени капацитети и затоа како што го потврдија тоа и меѓународните финансиски институции како и независни аналитичари, Северна Македонија има најдобар пристап во привлекување странски инвестиции споредено со БДП на државата и државите во регионот”, рече премиерот Димитар Ковачевски.
Тој се заблагодари на менаџерскиот тим на двете компании, Јангфенг и АРЦ Аутомотив кои како што рече препознаа во нашата држава подрачје за безбедно инвестирање и држава која нуди одлични услови за вложување.
„Отворањето на вакви производствени капацитети се ветар во грб на нашата држава и ја прават конкурентна на глобалниот пазар. Оваа заедничка инвестиција на овие две светски познати компании ја прави Северна Македонија земја во која се произведува и од која се извезува високо квалитетна опрема, за светски познати брендови од автомобилската индустрија, изјави премиерот Ковачевски.
Јован Деспотовски, директор на ТИРЗ истакна дека со паметен и флексибилен пристап С. Македонија докажува дека може и знае да биде достоен партнер за глобални играчи и светски компании.
„Првичните разговори за скромна инвестиција денес се сериозен инвестициски проект од 30 милиони евра. Со тоа покажавме дека и мала држава како Северна Македонија може и знае да биде достоен партнер за глобални играчи и компании како Јангфенг и АРЦ Аутомотив. И тоа не со пари и скапи кампањи туку со паметен и флексибилен пристап. Особено ме радува тоа што по разговорите кои ги имавме утрово со менаџментот е дека овој инвестициски проект ќе биде само вовед во нови заеднички проекти кои треба да донесат нови инвестиции и добро платени работни места. Оваа компанија ќе донесе 100 вработувања со плати над државниот просек. Она што охрабрува е дека АРЦ само годинава ги зголеми платите за 20% и ќе ги охрабрам да продолжат да го прават тоа”, изјави директорот на ТИР-зоните Деспотовски.
