Белгиската компанија „Avesta Battery and Energy Engineering“ (АБЕЕ) ќе гради фабрика за производство електрични батерии за автомобили во ТИРЗ Кичево. Вкупната инвестиција ќе изнесува 40 милиони евра, а ќе бидат отворени 600 нови работни места. Ова беше соопштено денеска во Брисел по потпишувањето на Договорот за реализација на инвестицијата денеска во Брисел го потпишаа директорот на Дирекцијата за технолошко индустриски развојни зони, Јован Деспотовски и сопственикот и генерален директор на АБЕЕ, Нешин Омар.
„Станува збор за брзорастечка компанија која вложува во напредни технологии. Севкупниот план е инвестиција од 40 милиони евра и 600 работни места. Просечната бруто плата ќе изнесува 1500 евра. Она што особено ме радува е дека просечната возраст на вработени во оваа компанијата сега е од 30 до 35 години и тие доаѓаат од 23 националности. Компанијата привлекува таленти од цел свет и верувам дека и фабриката во Македонија ќе стане хаб во кој ќе се привлекуваат вакви таленти, особено млади луѓе”, изјави Деспотовски.
Белгиската ABEE, која досега нема ниту една фабрика за масовно производство, во Кичево ќе се фокусира на развој и производство на системи за управување со батерии (BMS) и системи за енергетска електроника.
Сопственикот и генерален директор на АБЕЕ, Ношин Омар кажа дека е воодушевен што влегува во ова партнерство со Северна Македонија.
„Овој проект претставува клучна пресвртна точка во стратегијата за експанзија на АБЕЕ и е потврда на нашата заложба за изнаоѓање на технолошки иновации и решенија за енергетска одржливост. Убедени сме дека оваа фабрика ќе придонесе за економскиот раст на Северна Македонија и уште повеќе ќе ја зацврсти позицијата на АБЕЕ како глобален лидер во индустријата за батериски менаџмент системи”, кажа Омар.
„Авеста Батери и Енерџи Инженеринг“ во ТИРЗ Кичево ќе се фокусира на развој и производство на Батериски менаџмент системи (БМС) и системи за енергетска електроника. Производството се планира да започне во 2024 година, а производниот капацитет на компанијата ќе биде 300.000 единици годишно. Дополнително оваа компанија планира да развие и нова палета на производи кои ќе го прошират портфолиото на производи на АБЕЕ.
Која е белгиската комапнија која сака да произведува електрични батерии во Кичево?
Белгиската компанија „Avesta Battery and Energy Engineering АБЕЕ е релативно нова компанија основана во 2019 година и постои четири години. На нивната веб страница пишува дека е основана од професорот Ношин Омар со помалку од пет вработени, а бројот на вработени за три години се зголемил на околу 20-тина вработени.
„Авеста Батери и Енерџи Инженеринг“ е динамична инженерска компанија специјализирана за технологија за дизајн и рециклирање на батерии, како и за изнаоѓање напредни иновативни решенија за батерии и батериски системи за автомобилски и стационарни апликации со седиште во Белгија. Експертизата на ABEE вклучува дизајн на батериски системi, валидација и физибилити анализа поврзани со напредни производствени технологии за батерии.
Пред околу два месеци романски медиуми објавија дека белгиската компанија Avesta Battery and Energy Engineering (ABEE) планира да изгради фабрика за електрични батерии за автомобилската индустрија и да инвестира 1,4 милијарди евра.
Имено, претставниците на белгиската компанија најавиле дека ќе имаат производствен капацитет од 22 GWh годишно во Романија, а ќе развиваат и единица за рециклирање електрични батерии од 50.000 тони годишно. Според локалните романски медиуми, до средината на 2024 година треба да се добијат сите технички и административни одобренија, а во 2025 година да се купат производствените линии и реалните простори каде што ќе работи фабриката. Подоцна, од 2026 година фабриката ќе произведува електрични батерии за автомобилската индустрија.
“Портфолиото на компанијата ABEE вклучува интегрирани решенија за дизајн и производство на електрични батерии и таа веќе врши операции на овие полиња во Белгија, Турција и Македонија и сака да ги постави темелите на фабрика за електрични батерии и во Романија, во Галати. Основата се технологиите за производство на најнапредните типови на литиум-јонски електрични ќелии (LPF)“; пишува во написот објавен на 23 март, два месеци пред да се потпише Договорот за производство во Македонија.
Од финансиска гледна точка, пишува романскиот портал, за поддршка на инвестициите, ABEE сака да мобилизира сума од 1,4 милијарди евра, со користење на повеќе финансиски инструменти, како капитал или банкарски заеми, но во предвид се земаат и државните субвенции, но и европските фондови за развојот на зелената технологии.
Кон крајот на 2022 година, белгиската ABEE во соопштение објавува план да изгради гига фабрика за батериски системи во Белгија.
Во 2021 година специјализиран портал објави дека белгиската Avesta Battery & Energy Engineering (ABEE), IMECAR Elektronik од Турција и SOLITEK од Литванија потпишле договор за соработка за воспоставување на ново производство на батерии во Литванија, кое би требало да биде целосно функциононално до јануари 2023 година.
