Вредноста на извозот на јаболки од Македонија во првите четири месеци годинава изнесувал 6,3 милиони евра, што е пад од 38,7% во споредба со вредноста на извозените јаболка во истиот период минатата 2021 година, кога се заработиле 10,3 милиони евра.
Податоците на Државниот завод за статистика покажуваат дека количински во периодот од јануари до април годинава биле извезени близу 32% повеќе од истиот период лани, што значи дека јаболката годинава се продавале многу поевтино од лани.
Така, просечната извозна цена на јаболката годинава изнесувала 0,16 центи за килограм, додека во првите четири месеци лани јаболката од Македонија се продавале во странство по просечна цена од 0,36 центи за килограм
Главна причина за падот на вредноста на извозот на јаболка е губењето на рускиот пазар, кој традиционално беше најголем пазар за пласман на македонските јаболка на кој ова овошје се продава многу поскапо.
Податоците покажуваат дека и годинава извозот во Русија е најголем, односно се заработиле девизен приливи од 2,3 милиони евра, а биле продадени 5,9 милиони килограми јаболка.
За споредба, во Бугарија биле извезени двојно поголема количина на јаболка (11,7 милиони килограми), а вредноста на извозот изнесувал 1,2 милиони евра.
Но, овие цени се далеку повисоки од цените по кои јаболката се откупуваат од производителите, кои според информациите од производителите изнесувале и по ниски 2 денари.
Јаболката се најизвезувано овошје од Македонија. Податоците покажуваат дека вкупниот извоз на овошје од земјава во првите четири месеци годинава изнесувал 7,7 милиони евра, од кој 6,3 милиони евра е извозот на јабокка. Вредносно извозот на овошје годинава е помал за 33% во споредба со истиот период лани.
Количински, извозот на овошје во овој период е поголем за 29% во споредба со периодот јануари -април 2021 година.
