Зависноста на германската економија од Русија е многу поголема отколку само во енергетиката. Русија не е само главен извозник на гас за Германија, туку и пазар од каде германската индустрија се снабдува со важни суровини. Германија и светскиот пазар се особено зависни од рускиот извоз на никел, паладиум и хром, се вели во новата студија на Германскиот економски институт (IW). Станува збор за суровини кои тешко се заменуваат.
„Затоа, новите трговски односи со алтернативните пазари за овие суровини се од суштинско значење“, објасни Институтот од Келн.
Русија е гигант кога станува збор за суровини и природни ресурси
Затоа е важно да се продолжи со унапредување на договорите за слободна трговија како TTIP и CETA со други демократии кои се богати со природни ресурси и се што е можно постабилни, како што се САД, Канада и Јужна Африка.
Аналогно на проблемот со синџирот на снабдување, очигледно е дека за стабилна безбедност на снабдувањето е важно да се позиционирате пошироко кога станува збор за суровините. Според IW, неопходно е да се провери и „кои национални и европски капацитети се можни за рударење и понатамошна обработка на основните суровини“.
Третата опција вклучува рециклирање како извор на секундарни суровини и ја нагласува важноста на кружната економија во Германија и Европа.
Од руската инвазија на Украина на 24 февруари, федералната влада се обидува да го отвори патот Германија во иднина да биде помалку зависна од руската нафта и гас.
На прв поглед, прекинувањето на трговските односи со Русија за Германија изгледа како можно да се менаџира, пишуваат експертите на IW.
Кои суровини се уште се увезуваат од Русија?
Во 2019 година, пред корона пандемијата, само 2% од вкупниот увоз од Германија доаѓаше од Русија. Но, 40% од вкупниот увоз на никел доаѓа од Русија. Повеќе од 10% од целиот светски извоз на никел доаѓа од Русија.
Германија, исто така, увезува 25% од вкупниот увоз на паладиум од Русија, која се смета за светски најголем извозник на оваа суровина, која е многу важна за автомобилската индустрија.
Паладиумот главно се користи во производството на автокатализатори, во хемиската индустрија и во електротехниката.
Понатаму, повеќе од 20% од вкупниот увоз на хром и речиси 14% од увозот на кадмиум доаѓаат од Русија.
„Погледот на трговската статистика јасно покажува дека не само Германија, туку и светскиот пазар е зависен од Русија во однос на суровините”, се вели во анализата на Германскиот економски институт.
