Германската економија ќе изгуби повеќе од 260 милијарди евра (265 милијарди долари) во додадена вредност до 2030 година поради војната во Украина и високите цени на енергијата, што ќе се прелее и на пазарот на труд се вели во студијата на Институтот за истражување на вработување (ИАБ), пишува Reuters.
Германскиот бруто домашен производ (БДП) прилагоден според цените ќе биде за 1,7% помал следната година и ќе има околу 240.000 помалку вработени, се вели во студијата објавена во вторник.
Нивото на вработеност се очекува да остане на околу ова ниво до 2026 година, кога експанзивните мерки постепено ќе почнат да ги надминуваат негативните ефекти и да доведат до плус од околу 60.000 вработени во 2030 година.
Еден од големите губитници ќе биде угостителската индустрија, која веќе беше тешко погодена од пандемијата на коронавирус и веројатно ќе го почувствува падот на куповната моќ на потрошувачите.
Силно ќе бидат погодени и енергетско интензивните сектори, како што се хемиската индустрија и производството на метали.
Доколку цените на енергијата, кои досега пораснаа за 160%, повторно се удвојат, економското производство на Германија во 2023 година ќе биде речиси 4% пониско отколку што би било без војната, се вели во студијата. Според овие претпоставки, 660.000 помалку луѓе ќе бидат вработени по три години и уште 60.000 помалку во 2030 година, се вели во извештајот.
Германија е најголем извозен пазар за македонската економија, каде во првите шест месеци годинава се пласирани производи вредни 1,8 милијарди евра, што е 43% од целиот извоз на државата.
