Херберт Дис, извршниот директор на Volkswagen во изјава за Financial Times вели дека Европа се соочува со огромна закана од повисока инфлација од продолжениот воен конфликт во Украина
Според првиот човек на Volkswagen, најголемиот европски производител на автомобили, продолжената војна во Украина ризикува да биде „многу полоша“ за економијата во регионот отколку пандемијата на коронавирус.
Прекинот на глобалните синџири на снабдување „може да доведе до огромни зголемувања на цените, недостиг на енергија и инфлација“, изјави за Financial Times Херберт Дис, извршен директор на германскиот производител на автомобили. „Тоа би можело да биде многу ризично за европската и германската економија“.
Предупредувањето од еден од најпознатите деловни лидери на континентот доаѓа додека западните влади ги засилуваат своите економски напори да ја казнат Русија, клучен глобален снабдувач на многу стоки од гас до паладиум, поради нејзината инвазија на Украина.
Досега наметнатите санкции – и изгледите дека Кремљ би можел да возврати со исклучување на снабдувањето со гас во Европа – доведе до големи скокови на цените на енергетските пазари.
„Заканата од оваа војна за Германија и Европа е огромна“, рече Дис, посочувајќи дека повисоката инфлација може сериозно да ги притисне потрошувачите.
Инфлацијата во еврозоната достигна нов рекорд од 5,8% во февруари и се прогнозира да порасне до 7 % оваа година.
Поголемото потпирање на Европа на Русија за нејзините енергетски потреби веќе доведе до дивергенција околу енергетските санкции, при што Германија одлучи да не ги следи САД оваа недела во воведувањето целосно ембарго за нафта и гас.
Русија обезбедува 45% од увозот на гас во Европа, кој истовремено ги загрева домовите и помага во напојувањето на производниот сектор на континентот.
„За општество како Германија, со зависност од руската енергија, суровини“. . . ако замислите сценарио каде што ќе ги прекинеме деловните односи со Русија, што веројатно ќе треба да го направиме ако овој конфликт не престане, не можете повеќе да купувате енергија и тоа ќе доведе до ситуација што може да влијае на Европа и Германија значително“, рече Дис.
Шефот на VW истакна дека е за „максимални санкции“, но штом тие ќе бидат воспоставени „мора да се вратиме на преговори, на дијалог, бидејќи она што не сакаме е бескрајна војна во Украина“.
VW, кој има 500.000 вработени во Европа, минатата недела објави прекин на производството на возила во Русија „до понатамошно известување“, затворајќи ги своите производствени погони во Калуга и Нижни Новгород. Ривалските германски групи БМВ и Мерцедес, исто така, го прекинаа производство или продажбата во Русија.
Пред војната, VW беше принуден привремено да го запре производството во погоните во Германија поради недостиг на чипови. Сега голем е недостигот од електрични жици кои во најголем дел ги произведуваа компании со седиште во Украина.
Дис предупреди дека VW и пошироката европска економија наскоро би можеле да се соочат со многу поголеми проблеми од тесните грла во снабдувањето.
Иако VW има 7.000 вработени во Русија, пазарот не е особено важен за нејзиниот целокупен бизнис. VW и неговите други марки Skoda, Audi и Porsche продале нешто повеќе од 204.000 автомобили во Русија минатата година, од 9 милиони ширум светот.
