Европската унија (ЕУ) предлага пакет за финансирање од 1,5 милијарди евра за земјоделците кои се силно погодени од високите трошоци за енергија, ѓубрива и растечките производни трошоци.
Исто така се предвидува одлободување на 4 милиони хектари земја за одгледување на дополнителни земјоделски култури.
Ова се само некои од клучните мерки со кои ЕУ се обидува да ја зајакне безбедноста во снабдувањето на храната по руската инвазија на Украина, што предизвика големи пореметувања и проблеми во производството на храна во целиот свет.
Цените на храната пораснаа бидејќи војната ги прекина повеќето извозни испораки од Украина, која е меѓу најголемите извозници на житарки, пилешко, сончогледово масло…
Во првата исплата од фондовите за земјоделски кризи, блокот планира да обезбеди 500 милиони евра средства за земјите-членки кои ќе се распределат на земјоделците кои се најмногу погодени од високите цени на енергијата и ѓубривата.
Земјите од ЕУ потоа би можеле да ги надополнат тие средства со свои ресурси за да достигнат вкупна вредност од 1,5 милијарди евра.
„Иако самата ЕУ не се соочува со ризик за безбедноста на храната, ние сè уште треба да се занимаваме со прашањата за достапност на храна и да преземеме чекори за да ги направиме нашите земјоделски и синџири за снабдување со храна поотпорни и одржливи за да се справиме со идните кризи“, изјави извршниот потпретседател на Европската комисија, Валдис Домбровскис.
Како дел од мерките се предвидува и привремено ублажување на мерките за ограничувањата на увозот на добиточната храна, со цел им се овозможи на земјите од ЕУ да го надополнат недостигот од увозот од Украина со увоз на на пример од Јужна Америка.
Исто така можно е и намалување на данокот на додадена вредност (ДДВ) на храната на нула со цел да се намалат трошоците на потрошувачите, се вели во соопштението на Европската комисија.
