Европската унија планира да предложи задолжително постепено укинување на увозот на јаглен од Русија како директен одговор на извештаите дека руските сили извршиле очигледни воени злосторства во Украина, објавува Bloomberg.
Акцијата за јагленот ќе биде додадена на пакетот чекори насочени кон зајакнување на постоечките мерки и санкции кон Русија. Деталите за забраната и времето на исклучување на јаглен се уште се предмет на дискусија.
Европската комисија, исто така, се очекува да предложи забрана за влез на повеќето руски камиони и бродови во блокот.
По објавата на информациите за можна забрана за увоз на јаглен од Русија, годишните фјучерси за јаглен испорачан во северозападна Европа скокнаа за дури 7,9% до 205 долари за тон.
Русија испорачува околу половина од термичкиот јаглен во ЕУ, кој се користи за гориво за нејзините електрани и за производство на електрична енергија.
ЕУ и Кина се најголеми купувачи на рускиот јаглен.
ЕУ засега не планира да санкционира нафта или гас, и покрај силниот притисок да воведе построги економски санкции кон Русија.
Но, земјите на ЕУ се длабоко поделени околу следните чекори и некои влади продолжуваат да вршат притисок за оваа недела барем да се даде сигнал дека ЕУ размислува да го намали увозот на руска нафта.
Неколку влади, вклучително и Германија и Унгарија, се спротивставија на проширувањето на опсегот на санкциите кон енергетскиот сектор на Русија, но наводите дека руските трупи кои се повлекувале егзекутирале голем број невооружени цивили, доведоа до обновен притисок од страна на некои од источните членки на блокот да ги зајакнат санкциите.
За одобрување на мерката за забрана за увоз на јаглен од Русија е потребна поддршка од сите 27 земји-членки.
Исто така, ЕУ има за цел да ги прошири контролите на извозот на повеќе технологии кои се користат во одбранбениот сектор и другите клучни индустрии, како и ограничувањата за продажба на опрема за ЛНГ.
Понатаму, се предлага да се додадат уште десетици луѓе и ентитети на списокот на санкционирани поединци и компании, вклучително и банки, како што е VTB Bank , кои се отсечени од глобалниот систем за пораки за плаќања SWIFT, но сè уште не се целосно санкционирани.
Претседателката на Европската комисија Урсула фон дер Лајен оваа недела ќе го посети Киев за да се сретне со украинскиот претседател Володимир Зеленски во знак на поддршка за земјата. ЕУ, исто така, рече дека ќе и помогне на Украина да собере докази за потенцијални воени злосторства.
