Доналд Трамп по втор пат се врати во Белата Куќа, како 47-ми претседател на САД со ветување дека во неговиот втор мандат ќе ја направи Америка повторно силна. „Од овој момент, падот на Америка заврши“, изјави Трамп, прогласувајќи ново „златно доба“ во кое тој вети да ја врати безбедноста на границите, да ги таргетира ривалските нации со високи царини и да го прошири домашното производство на енергија.
Свеченоста за неговата инаугурација ја посетија голем број познати личности и поддржувачи, но најевидентно беше присуството на некои од најголемите милијардери во светот и лидери на најголемите технолошки компании.
Уште на првиот ден Трамп потпиша низа извршни наредби за кои рече дека ќе донесат „револуција на здравиот разум“. Трамп издаде низа извршни наредби, вклучително и прогласување национална вонредна состојба на јужната граница, почнување на дополнително домашно производство на енергија, повлекување на САД од Парискиот климатски договор и од Светската здравствена организација, прекинување на програмите за различности потенцирајќи дека „отсега официјална политика на владата на САД ќе биде да има само два пола, машки и женски“, како и многу други одлуки кои се однесуваат на имиграцијата, енергијата, војската…
Тој исто така рече дека ќе го преименува Мексиканскиот залив во Американскиот залив и вети дека ќе испрати американски астронаути на Марс.
Претседателот Трамп на првиот ден на функција се воздржа од воведување на најавените царини кон Кина, но најави дека ќе воведе царини од 25% за Мексико и Канада, повторувајќи го своето тврдење дека двата непосредни соседи на Америка дозволуваат мигранти без документи и со дрога да влезат во земјата.
Трамп, исто така, посочи дека сè уште размислува за универзална царина за сите странски увозни производи во САД, но рече дека „сè уште не е подготвен за тоа“.
Во продолжение некои од најзначајните одлуки:
Трговија и економија
Царини
Трамп ќе ги повика федералните агенции да ги проучат царинските политики и трговските односи на САД со Кина, Канада и Мексико. „Веднаш ќе започнам со ремонт на нашиот трговски систем за да ги заштитам американските работници и семејства“, рече тој.
Трамп, исто така, рече дека планира да донесе царини од дури 25% за Мексико и Канада до 1 февруари.
Служба за надворешни приходи
Трамп рече дека ќе формира Служба за надворешни приходи (External Revenue Service) додавајќи дека „тоа ќе бидат огромни суми пари што ќе се слеваат во нашиот Трезор кои доаѓаат од странски извори“. „Наместо да ги оданочуваме нашите граѓани за да ги збогатиме другите земји, ние ќе ги цариниме и оданочуваме странските земји за да ги збогатиме нашите граѓани“, рече тој.
Вонредна состојба на инфлација
Трамп им нареди на одделите и агенциите „да испорачаат итни олеснувања на цените“, вклучувајќи ги трошоците и понудата на станови, намалување на трошоците за здравствена заштита и елиминирање на климатските политики што ги зголемуваат цените на енергијата.
Енергија и клима
Трамп се повикува на итни овластувања во обид да го поттикне домашното производство на енергија и да ги поништи политиките од времето на Бајден дизајнирани да се борат против климатските промени. Во резимето на плановите на Белата куќа се вели дека Трамп „ќе ја ослободи американската енергија со ставање крај на политиката на Бајден за климатски екстремизам, рационализирање на дозволите“ и разгледување за можно поништување „сите регулативи кои наметнуваат непотребни оптоварувања на производството и користењето енергија, вклучително и рударството и преработката на не-горивни минерали“.
Истражување на нафта и гас
Трамп планира да отвори повеќе области за истражување на нафта и гас, вклучително и офшори и Алјаска. „We will drill, baby, drill,” рече тој во својот говор.
Трамп, исто така, рече дека планира повторно да ги наполни американските стратешки нафтени резерви „до врвот“ и „да извезува американска енергија низ целиот свет“.
Ветерни паркови
Администрацијата ќе стави крај на закупот на области за „масивни“ ветерни електрани за кои Белата куќа рече дека „ги деградираат нашите природни пејсажи и не им служат на американските потрошувачи на енергија“.
Мандат за електрични возила
Трамп потпиша наредба да се елиминира она што тој го нарече „мандат за електрични возила“ делумно со укинување на субвенциите за возилата и укинување на државните откажувања од емисиите „кои функционираат за ограничување на продажбата на автомобили на бензин“.
Парискиот договор
Како што направи во неговиот прв мандат, Трамп повторно ќе ги повлече САД од Парискиот договор од 2015 година. Сепак, не се очекува да биде веднаш: потписниците мора да достават формално известување до Обединетите нации да иницираат повлекување, а потоа да чекаат една година за да стапи на сила.
ТикТок
Трамп привремено ја запре забраната за TikTok во САД, давајќи им на компанијата и на нејзиниот кинески сопственик ByteDance повеќе време да постигнат договор за популарната апликација што ќе ги реши долгогодишните грижи за националната безбедност на САД. Со овој потег на платформата и се даде дополнителен период од 75 дена.
