Од приближно 900.000 возила што европската автомобилска индустрија ги извезе во САД во 2024 година, само 75% до 77% би можеле да останат годинава, доколку царините што ги воведе американскиот претседател се задржат до крајот на годината.
Европа, преку производителите од ЕУ и Велика Британија, извезе над 900.000 возила во САД во 2024 година, при што VW, Mercedes, BMW и Audi се најголемите брендови што се продаваат на американскиот пазар.
Првата студија спроведена од француската компанија „Иновев“ покажува дека, во зависност од бројот на месеци во кои се одржуваат царините на Доналд Трамп, продажбата на европски автомобили прогресивно би се намалила и би можела да достигне до 200.000 возила, во најпесимистичкиот случај, во кој царините нема да бидат укинати до крајот на оваа година.
За Европа, ова би претставувало силно влијание врз автомобилската индустрија, со оглед на тоа што САД се најголемиот извозен пазар, далеку пред Турција или Кина.
Вредноста на изгубените автомобили би можела да достигне и до 10 милијарди евра, при што поголемиот дел од загубата доаѓа од Европската Унија.
ACEA соопшти дека ЕУ покрива 750.000 возила од вкупниот извоз на Европа, во вредност од 38,5 милијарди евра.
Покрај тоа, стотици илјади други возила беа произведени во Мексико од европски компании за американскиот пазар.
Исто така, трговијата со САД или Мексико, неопходна за производство на возила, вклучува извоз на компоненти произведени во Европа. Проценките направени од Иновев се базираат на фактот дека царините ќе генерираат зголемување на цените и, автоматски, големо намалување на побарувачката за автомобили произведени во Европа.
Секоја одлука за преместување на производството во САД, донесена од европските автомобилски компании, има многу долги рокови за имплементација, дури и само за воведување на еден модел на постоечка производствена линија.
Според Иновев, групацијата VW учествува со 26% во извозот на европски автомобили во САД, додека Mercedes има 23%, BMW – 19%, Geely (Volvo) – 13% и Jaguar Land Rover 12%. Најпродаваните европски увозни автомобили во САД се Mercedes GLC со 60.000 единици, по што следуваат Volvo XC90 и XC60.
