И покрај сложените услови за работа кои ги предизвикаа пандемијата и енергетската криза, вредноста на извозот на македонската индустрија за преработки од овошје и зеленчук продолжува да расте.
Според податоците на Државниот завод за статистика во периодот од јануари до октомври 2022 година од Македонија биле извезени преработки од овошје и зеленчук во вредност од 61,1 6 милиони евра, што е раст од 18,6% или за 9,6 милиони евра повеќе во споредба со истиот период изминатата 2021 година.
Но, статистиката покажува дека извезените количини на преработки од овошје и зеленчук бележат намалување во истиот период од 6,8%. Имено во првите десет месеци годинава извезени близу 34 илјади тони преработки од зеленчук и овошје, додека во истиот период лани бил остварен извоз од 36,5 илјади тони.
Станува збор за извоз на преработки од зеленчук и овошје, односно конзервирани на разни начини, зеленчуци во оцетна киселина, овошни компоти, џемови, мармелади, сокови, или производи од групата на тарифни броеви 2001 до 2009.
За споредба извозот на преработки од овошје и зеленчук од Македонија во текот на целата измината 2021 година изнесувал 67,6 милиони евра.
Податоците покажуваат дека дури две третини или 37 милиони евра од вкупниот извоз на преработки од овошје и зеленчук од земјава отпаѓа на продажбата на ајвар на странските пазари.
Топ 10 најголеми извозни пазари
Гледано по земји, македонските преработки од зеленчук и овошје за десетте месеци годинава најмногу се продавале во Србија. Вредноста на извозот кај нашиот северн сосед во десетте месеци годинава изнесувал 11,8 милиони евра. Втор извозен пазар била Хрватска, каде во истиот период биле извезени производи во вредност од речиси 9 милиони евра. Следат Германија со извоз од 6,76 милиони евра, Косово со извоз од 3,7 милиони евра и БиХ со извоз од 3,17 милион евра.
