Британската бизнис асоцијација организира онлајн инфо сесија за компании кои се заинтересирани за извоз на своите производи во Обединетото Кралство. Инфо сесијата ќе се одржи на 13 февруари во 15 часот и ќе се одвива на англиски јазик.
“На македонските компании од прехранбената индустрија дополнително ќе им биде понудена ексклузивна можност за учество во Меѓународниот саем за храна и пијалоци (International Food & Drink Event – IFE) кој ќе се одржи од 25 до 27 март во Лондон. На овој настан се очекуваат околу 27.000 посетители, а ќе изложуваат повеќе од 1.500 компании”, информираат од Британската бизнис асоцијација.
Учесниците во инфо сесијата ќе добијат и водич за извоз во Обединетото Кралство и други корисни ресурси.
Компаниите кои имаат интерес да учествуваат на настанот може да го пријават своето учество на следниот линк https://lnkd.in/dJfQh5Aa.
Велика Британија е втор најголем трговски партнер за македонската економија со обезм на трговска размена од над 1,5 милијарди евра. Изминатата 2023 година од Македонија во Велика Британија биле извезени производи во вредност од 125,6 милиони евра, што е пад од 22% во споредба со претходната 2022 година. Увозот, пак, од Британија лани изнесувал близу 1,4 милијарди евра и е намален за дури 27,3%.
На британскиот пазар лани најмногу се извезувале седишта, мебел и постелнина во вредност од 31 милион евра, катализатори со извоз од 20 милиони евра, згура и остатоци од метали во вредност од 19 милиони евра, електрични машини и опрема во вредност од 12 милиони евра, делови за возови и трамваи во вредност од 11,8 милиони евра.
Лани во Велика Британија од земјава биле извезени разни производи за исхрана, меѓу кои сладолед, во вредност од 2 милиони евра. Околу 2 милиони евра изнесувал извозот на преработки од зеленчук и овошје, додека лани на британскиот пазар биле извезени и кондиторски производи во вредност од 1 милион евра, како и чоколадо и производи од какао во вредност од 870 илјади евра.
Фото: Shutterstock
