Кина денеска објави нов список со 79 американски производи за кои ќе бидат укинати царините наметнати во екот на трговската војна со САД.
Министерството за финансии на Кина со соопштение информира дека укинувањетона царините ќе стапи на сила на 19 мај и ќе истече на 18 мај 2021 година.
На последниот список со производи за кои се укинуваат царините се наоѓаат и руди на ретки метални метали, златни и сребрени руди и концентрати.
Кинеското министерство не ја откри вредноста на увозот на производите кои се ослободуваат од царини.
Пекинг во февруари годинава соопшти дека ќе одобри ослободувања од царини за 696 американски производи, вклучувајќи ги и клучните производи, како што се соја и свинско месо.
Главните трговски преговарачи на Пекинг и Вашингтон остварија телефонски повик минатата недела и разговараа за спроведувањето на првата фаза од договорот кој двете земји го потпишаа во јануари годинава.
Според договорот, Кина се согласи да го зголеми увозот на стоки од САД за 200 милијарди долари во период од две години, со околу 77 милијарди долари во првата година и 123 милијарди долари во втората година.
Обновените тензии меѓу двете земји, предизвикани од пандемијата COVID-19, која започна во Кина кон крајот на минатата година, отвараат многу прашања во врска со трговското примирје.
Претседателот на САД, Доналд Трамп се закани дека ќе го раскине договорот ако Кина не ги исполни своите обврски за увоз на американски производи.
И покрај тензиите меѓу двете земји, кинеското министерство за надворешни работи денеска излезе со став дека постојниот договор е добра работа и за Кина и за САД и за целиот свет.
