Светската трговска организација (СТО) денеска излезе со прогноза дека во 2020 година ќе има пад во светската трговија кој ќе изнесува од 13% до 32%, како последица на големите нарушувања кој пандемијата со коронавирусот ги предизвика во економската активност и живеењето.
Сите региони ќе забележат двоцифрен пад на трговијата, извозот и увозот, а најмногу погоден ќе биде извозот од Северна Америка и Азија, се вели во денеска објавениот извештај на СТО.
Најголем пад ќе имаат секториите и индустриите кои се зависни од сложените ланци на снабдување, како на пример телекомуникациите и автомобилската индустрија.
Заради ограничувањата на движење и социјалното дистанцирање за да се забави ширењето на болеста силно е погодена и трговијата со услугите, посебно преку транспортот и патувањето.
Експертите го потенцираат значителниот распон во прогнозата заради „досега незабележениот карактер на актуелната здравствена криза и несигурноста во однос на нејзините точни економски последици”.
“Беа затворени цели сектори на националните економии, вклучително хотели, ресторани, несуштинска трговија на мало, туризам и значителен удел во производството. Во вакви околности, предвидувањата бараат силни претпоставки за прогресија на болеста и поголема доверба во проценетите, отколку на пријавени податоци”, велат од СТО.
Според економистите од СТО, „падот веројатно ќе го надмине и падот што беше регистриран за време на светската финансиска криза во 2008-2009 година“.
Како што на денешната прес конференција во Женева изјави генералниот директор на СТО, Роберто Азеведо, економистите на организацијата разработиле две сценарија за кризата. Според оптимистичкото сценарио, владите ќе можат брзо да ја надминат ситуацијата и тогаш падот ќе изнесува 13%.
-Но, според второто сценарио, доколку не е можно брзо надминување на кризата, падот во светската трговија со стоки може да достигне и до 32%, па дури и повеќе, вели Азеведо.
Тој потсети дека актуелната криза „ ги принуди државите да преземат досега невидени мерки за да ги заштитат животите на луѓето”.
„Намалувањето на трговијата ќе има „болни последици за семејствата и бизнисот“, заклучи Азеведо.
