Русија и Саудиска Арабија постигнаа договор со другите големи производители на сурова нафта за да го намалат производството во обид да го стабилизираат падот на цените предизвикан од пандемијата на коронавирусот.
Членовите на ОПЕК и нивните сојузници, вклучително и Русија и Мексико, вчера објавија дека се согласиле да го намалат производството за 9,7 милиони барели на ден во мај и јуни, што е едно од најголемите намалувања што некогаш биле договорени од светските производители на нафта. Договорените скратувања ќе траат до април 2021 година кога групата ќе почне да го засилува производството.
Групата на производители на нафта, која заедно е позната како ОПЕК +, се обидуваше да го намали производството со цел да го спречи падот на цените, откако цената на нафтата падна на 18-годишен минимум.
Падот се случи откако Саудиска Арабија и Русија се откажаа од намалувањето на производството во почетокот на март и започнаа ценовна војна преплавувајќи го пазарот со огромни количини на сурова нафта.
Во меѓувреме, ограничувањата во движењето и патувањата заради коронавирусот предизвикаат огромен пад на побарувачката на нафтените деривати предизвикувајќи дополнителен пад на цените на нафтата.
Но, аналитичарите од Голдман Сакс го нарекоа договорот „историски, сепак недоволен“, додавајќи дека доброволното кратење на производството на нафта е „премало и предоцна” за да се спречи падот на цените.
„Ова едноставно покажува дека ниту едно доброволно кратење на производството нема да биде доволно за да се надоместо гоплемиот пад на побарувачката за нафта”, велат од Голдман Сакс.
Инвестициската банка сè уште очекува падот на цените на нафтата да продолжи и во наредните недели, бидејќи складирањето брзо се наполни, дури и кога Организацијата на земјите извознички на нафта и нејзините сојузници постигнаа договор за драстично намалување на глобалното снабдување.
