Компанијата за производство на железо, челик и феролегури Либерти (поранешен Арчелор Митал ЦРМ), објави дека во првите шест месеци годинава остварила приходи од продажба од 51 милион евра, кои се за 41% помали во однос на приходите остварени првата половина од 2022 година.
Пад бележат и приходите од продажба на странски пазари и продажбите на домашен пазар.
Компанијата Либерти е една од најголемите извозни компании во Македонија и околу 81% од вкупните приходи во првата половина годинава се остварени од извоз. Извозот во овој период достигна вредност од 41 милиони евра, што е пад од 43% во споредба со истиот период лани, покажува финансискиот извештај на компанијата објавен на Македонската берза.
Продажбите на домашниот пазар во првите шет месеци годинава изнесувале 9,7 милиони евра и бележат пад од 33% во споредба со истиот период лани.
“За жал, негативното влијание на светската економската криза, како и економските последици од војната во Украина, се уште се значително се чуствува во индустријта. Падот во приходите пред се е продолжена рака на целокупната економска состојба во светот, а ние како увозно извозно ориентирана компанија значително го чуствуваме ова влијание. Зголемените цени на суровините – топловаланата трака иако цените на енергенсите се стабилизираа се уште ги држат цените на чинење на произведените производи на високо ниво додека цените на готовите производи не го следеа тој раст од една страна, а од друга страна и намалената побарувачка за готов производ доведоа до намалување на призводството и продажбата со што се намалија и приходите”, објаснуваат од Либерти.
Оперативните расходи на компанијaта во првата половина годинава се намалени за 49%, достигнувајќи 47,5 милиони евра.
Од компанијата објаснуваат дека расходите се намалени заради намаленото произведено количество, но од друга страна тие се значајно високи заради зголемената цена на репро материјалите, додека цените на енергенсите се значително намалени и постабилни од претходните периоди.
Најновите податоци од Државниот завод за статистика покажуваат дека производството на метали во првите шест месеци годинава бележи голем пад од дури 36,5% во споредба со лани.
Во првата половина годинава компанијата Либерти работела со оперативна загуба од 6,7 милиони евра, што е значително влошување во споредба со истиот период лани, кога компанијата работела со загуба од 4,3 милиони евра.
Нето финансискиот резултат за првите шест месеци е негативен, одосно компанијата остварила загуба од близу 8 милиони евра, што е значително влошување во споредба со загубата од 4,6 милиони евра во првата половина од 2022 година.
“И покрај сите напори за намалување на трошоците и поефикасна работа, сепак на резултатот од оперативното работење ваквите ценовни движења на главниот репроматеријал – топловалана трака, кој е главниот носител на вредноста на расходите, а за жал на кои не можеме да влијаеме, прават финансиски загуби како резултат на вреднувањата, а пред се на драстично намалената пазарна цена на готовиот производ. Позитивна вест за нас е тоа што можеме да забележиме дека цената на готовите производи во наредниот период се очекува да се зголеми”, велат од компанијата Либерти.
Компанијата Либерти или поранешен Арчелор Митал, од јули 2019 година стана дел од британската Liberty House Group (Либерти Хаус Груп), која минатата година изврши преземање на 5 индустриски капацитети од Арчелор Митал во Европа, со вкупна вредност од 740 милиони долари.
Liberty House Group (Либерти Хаус Груп) е меѓународна групација со седиште во Велика Британија, специјализирана за производство на челик и алуминиум, со важни трговски операции со суровини и рециклирање на метал. Либерти Хаус има свои капацитети во Велика Британија, САД и Австралија како и во многу други земји.
