Слабеењето на германската индустрија и намалената потрошувачка во Германија го намалуваат македонскиот извоз веќе четврти месец по ред.
Последните податоци од Државниот завод за статистика покажуваат дека во ноември од Македонија биле извезени производи во Германија во вредност од 293 милиони евра, што е за 16% помалку во споредба со истиот месец лани кога извозот во најголемата европска економија изнесувал близу 350 милиони евра.
Извозот во Германија бележи пад веќе четврти месец по ред. Имено, статистичките податоци покажуваат дека извозот во октомври имал пад од 10,7%, во септември од 6,5%, а во август падот изнесувал дури 29,1%.
За периодот од јануари до ноември 2023 година извозот на стоки од Македонија во Германија изнесувал 3,3 милијарди евра и е помал за 1,7% во споредба со истиот период една година претходно. Во првите 11 месеци од 2023 година, 44% од вкупниот извоз на државата бил пласиран во Германија, што се смета за голема и опасна изложеност на економијата кон една држава.
Во истиот период, од Германија биле увезени стоки во вредност од 1 милијарда евра, 10% повеќе во споредба со истиот период во претходната година.
Германската економија минатата 2023 година ја заврши со рецесија. Потрошувачите во најсилната европска економија се воздржуваат од трошење поради инфлацијата и растот на цените, а во истовреме слабата глобална економија ги оптоварува извозниците, кои порано беа движечка сила на економијата.
Дополнително, поради нестабилните цени на енергијата, бројни меѓународни корпорации ги ставаат во мирување своите инвестициски планови во Германија или градат нови производствени капацитети во странство – во САД или Кина, далеку од Европската унија.
Исто така амбициозната зелена трансформација на најголемата европска економија чини многу пари и е голем товар за економијата.
Проценките се дека и оваа 2024 година Германија ќе биде тешка на економски план.
Буџетот за 2024 година беше значително намален. Аналитичарите стравуваат дека планираното намалување на трошоците, помалку субвенции и повисоки цени на енергијата би можеле дополнително да ја забават економијата, па дури и повторно да ја разгорат инфлацијата. Ако на тоа се додадат и геополитичките конфликти и неизвесната економска ситуација на глобален план, јасно е дека нарачките од германската економија нема да да ја повлечат македонаката економија.
Германија е најголем трговски партнер на Македонија, каде се пласира речиси половина од извозот на државата.
