На глобалната економија ќе и треба многу подолго за да се опорави целосно од шокот предизвикан од новиот коронавирус отколку што првично се очекуваше, вели Кристалина Георгиева, директор на Меѓународниот монетарен фонд за Ројтерс.
Како една од големите опасности од оваа криза, Георгиева го истакнува протекционизмот.
Според нејзе, Фондот најверојатно ќе ја ревидира надолу својата прогноза за 3% пад на БДП во 2020 година. Ова, исто така, може да предизвика промени и во предвидувањата на Фондот за делумно закрепнување од 5,8% во 2021 година.
Во интервју за Ројтерс, таа рече дека податоците од целиот свет се полоши од очекуваните.
„Очигледно тоа значи дека ќе ни треба многу подолго време за целосно закрепнување од оваа криза“, рече Георгиева.
Во април, ММФ прогнозираше дека затворањето на деловните активности и заклучувањата за забавување на ширењето на вирусот ќе го фрлат светот во најдлабока рецесија од Големата економска криза во 1930-тите години.
Но, податоците објавени од тогаш укажуваат на „повеќе лоши вести“, рече Георгиева.
ММФ треба да ги објави новите глобални проекции во јуни. Гергиева за Ројтерс вели дека Фондот бил фокусиран на ризици како што се високи нивоа на долг, зголемени дефицити, невработеност, банкрот, зголемена сиромаштија и нееднаквост за време на периодот на закрепнување.
Од друга страна, вели таа,кризата исто така ја зајакнува дигиталната економија, нудејќи шанса за зајакнување на транспарентноста и е-учењето, и овозможување пристап до пазарите дури и на малите фирми.
На прашањето за обновените тензии меѓу САД и Кина – двете најголеми економии во светот, Георгиева рече дека ги повикува земјите-членки на Фондот да одржат отворена комуникација и слободни трговски текови што ќе го поддржи глобалниот раст.
„Треба да ги одржуваме трговските текови отворени, особено за медицински материјали, храна и долгорочно да најдеме патека за надминување на она што се случува сега со оваа криза“, рече Георгиева. „Ние сакаме да продолжиме да ја градиме оваа попросперитетна иднина за сите со надминување на лузните што можат да произлезат од оваа криза“.
Тензиите меѓу Соединетите држави и Кина се зголемија во последните неколку недели, при што официјалните лица од двете страни сугерираат дека тешко постигнатиот трговски договор може да биде напуштен.
Георгиева предупредува на опасноста од вртење кон протекционизам како последица на оваа криза.
„Не треба да се вртиме од она што функционираше за луѓето низ целиот свет: поделбата на трудот и соработката и трговијата, што овозможуваа да се спуштат трошоците за стоките и услуги, и дозволуваа да се зголемат приходите и да се намали сиромаштијата“, вели таа за Ројтерс.
