Се повеќе контејнерски бродови чекаат да бидат расчистени пред пристаништата во Северното Море. Ова има сериозни последици за прекуокеанската трговија на ЕУ и Германија.
Според Килскиот институт за светска економија (IfW), сообраќајниот метеж на контејнерските бродови во Северното Море има тенденција да се зголемува. „Повеќе од два отсто од глобалниот товарен капацитет е заглавен таму и не може ниту да се товари ниту истовари“, рече експертот на IfW, Винсент Стамер во средата. Ова е „многу необично“ за Северното Море.
Редиците растат и на кинеските пристаништа Шангај и Жеџијанг: повеќе од четири отсто од глобалниот товарен капацитет е заглавен во овие пристаништа.
„Во моментов не се гледа крај на метежот во транспортот со контејнери“, рече Стамер. „За Германија и ЕУ, ова првенствено влијае на трговијата во странство, особено со Азија, од каде се испорачува потрошувачка електроника, мебел и текстил.
Според IfW, моментално има 20 % помалку контејнерски бродови на Црвеното Море – најважната трговска рута меѓу Европа и Азија – отколку што би се очекувало во нормални околности. Последен пат јазот беше толку голем по избувнувањето на пандемијата на корона пред две години.
„Главната причина за ова може да биде што негативните ефекти од заклучувањето во Шангај дури сега стануваат очигледни поради 40-дневното патување од Кина до Европа“, рече Стамер.
„Застојот на контејнерските бродови во Северното Море и зголемената важност на железничкиот транспорт на Новиот пат на свилата, исто така, може да го намалат обемот на товарот таму.
И покрај овие проблеми, светската трговија благо порасна во јуни во споредба со претходниот месец, според трговскиот показател во Кил.
„Но, огромниот метеж на бродовите, високите транспортни трошоци и тесните грла за испорака што произлегуваат ја попречуваат размената на стоки, особено кон Европа“, рече Стамер. За Германија, вредностите покажуваат пораст на увозот од 2,5% и мал пад на извозот 0,1%.
Цените за бродски контејнерски транспорт од Азија до Северна Европа се уште се речиси шест пати повисоки од пред две години.
Извор: Handelsblatt
