Претседателот на Владата на Република Северна Македонија Христијан Мицкоски, оствари средба германските инвеститори во земјата и повеќе од 100 компании членки на Македонско-Германското стопанско здружение.
АХК Северна Македонија, кој е дел од мрежата на 150 германски комори во светот и Македонско-Германското стопанско здружение денес организираа работна средба со претседателот на владата, Христијан Мицкоски.
На настанот присуствуваа повеќе од 100 претставници на компании членки и истиот го отвори Антје Ванделт, директорка на АХК Северна Македонија и раководен член на Управниот Одбор на Македонско- Германското стопанско здружение.
На настанот присуствуваат и министерката за финансии, Гордана Димитриеска- Кочоска и министерот за економија, Бесар Дурмиши, директорот на Царинската управа Бобан Николовски, директорката на Управата за јавни приходи, Елена Петрова и директорот на ТИРЗ, Гоце Димовски.
Ванделт соопшти дека Македонско- Германското стопанско здружение ја надмина бројката од 175 компании членови и со тоа е дефинитивно најголемото билатерално стопанско здружение во земјата.
Но, не расте само бројот на компании членки туку од година во година расте и економската соработка помеѓу Германија и Северна Македонија. Во 2023 година трговска размена помеѓу двете земји изнесуваше 5.133 милијарди евра, а во однос на инвестициите Германија и понатаму останува најголем инвеститор во земјата. Истовремено германските инвеститори се и најголемите работодавачи каде се вработени повеќе од 25 000 лица.
„Во изминатите години повеќето од германските инвеститори кои работат во земјата се одлучија да реинвестираат во Северна Македонија, а не на некој друг пазар. Особено ме радува дека истовремено ни се случува и диверзификација на секторите во кои се инвестира. Иако инвеститорите од автомобилската индустрија се најмногубројни, сепак, имаме и инвестиции во здравствениот сектор, ИТ услуги, изработка на специјален текстил за седишта во камиони, возови и автобуси, апарати за домаќинство, заштитна облека, производство на батерии за електрични велосипеди, производство на бакарни кабли, но и Кол центрите кои вработуваат голем број на луѓе и важат за многу посакувани работодавачи, изјави Антје Ванделт.
Пред присутните гости се обрати и премиерот Мицкоски, кој на стопанствениците им ги соопшти плановите на новата влада за економски развој на земјата. Тој говореше дека „Владата ќе се залага да создаде стабилна бизнис клима со економски политики кои се темелат на принципи на транспарентност и уште подобри услови како за домашните, така и за странските инвеститори“, соопшти Мицкоски.
„Целта е исто така да се зголеми конкурентноста на приватниот сектор и да се постигне забрзување на економскиот раст и подобрување на животниот стандард. Исто така, ќе работиме и на реализација на капитални инвестиции во инфраструктурата и енергетиката со цел да се обезбеди побрз и побезбеден транспорт“, кажа Мицкоски.
Воедно овој настан беше одлична можност за вмрежување на претставниците на компаниите, но и можност да ги запознаат новиот премиер на РМ и економскиот тим на Владата.
