Светската трговска организација (СТО) одлучи дека Европската унија (ЕУ) има право да воведе царини во вредност од 4 милијарди долари за увезена стока од САД, како противмерка заради субвенциите што Вашингтон ги одобрил на производителот на авиони „Боинг“.
Според Ројтерс, со овој потег на СТО се продолжува рекордниот трговски спор за време на кој Вашингтон веќе воведе царин за увоз на одредени европски производи.
Сепак, преговарачите од двете страни велат дека оваа одлука конечно може да доведе до разговори за решавање на 16-годишната правна битка за субвенционирање на производители на авиони американскиот Боинг и европскиот Ербас.
И САД и ЕУ покажаа интерес за решавање на спорот, но во исто време се обвинуваат едни со други дека одбиваат да разговараат сериозно.
Одлуката на СТО, која беше одложена заради пандемијата „Ковид-19“, доаѓа по минатогодишната пресуда на оваа организација, која одобри Вашингтон да воведе царина за 7,5 милијарди долари вредна увезена стока од ЕУ поради субвенционирање на „Ербас“, кој има производствени капацитети во Велика Британија, Франција, Германија и Шпанија.
Претставникот на САД Роберт Лајтхајмер изјави дека секое воведување царини од страна на ЕУ за американските авиони и друга стока во вредност од 4 милијарди долари „е очигледно спротивно на принципите на СТО и ќе предизвика одговор на САД.
Европската комисија соопшти дека ќе се откаже од воведување на увозните царини доколку Вашингтон ги повлече своите царини воведени за европски производи, вклучително и царините за вино и виски.
